«Báıterek» ekonomıkanyń naqty sektoryn 8 trln teńge kóleminde qarjylandyrmaq

ASTANA. KAZINFORM – «Báıterek» bıyl ekonomıkanyń naqty sektoryn 8 trln teńge kóleminde qarjylandyrmaq. Bul týraly Úkimet otyrysynda «Báıterek» UIH» AQ Basqarma tóraǵasy Rýstam Qaraǵoıshın aıtty.

- 2026 jyly holdıngke 1 trln teńge kapıtal berilse, ekonomıkanyń naqty sektoryn qarjylandyrý kólemin 8 trln teńgege deıin jetkizý josparda bar. Holdıng shaǵyn jáne orta bıznes pen basym salalardy qoldaý boıynsha kelesideı jospar quryp otyr. Ónerkásipti damytý qory quny 7 mlrd teńgeden bastalatyn óndiristi turaqty damytýǵa baǵyttalǵan jobalardy qoldaıtyn bolady jáne mashına jasaý sektorynda tolyqqandy damý ınstıtýty bolyp ózgeredi. Bul rette, Ulttyq bank jáne basqa da memlekettik organdardyń ustanymdaryna oraı, 7 mlrd teńgege deıingi jobalardy ekinshi deńgeıli bankterge berýdi kelistik, - dedi ol.

Onyń aıtýynsha, «Damý» qory ekinshi deńgeıli bankterdiń ekonomıkany qarjylandyrýdaǵy úlesin kóbeıtý úshin shaǵyn jáne orta bıznestiń nesıelerin qoldaýdy budan ári jalǵastyrady.

Agrarlyq nesıe korporatsııasy men QazAgroQarjy ishki naryqqa baǵyttalǵan ónerkásip jobalaryna tereń óńdeý men tamaq ónerkásibine 1 trln teńgege qoldaý kórsetedi.

- Qazaqstannyń damý banki shıkizattyq emes eksportty qoldaýǵa 2 trln teńge baǵyttaıdy. Qazaqstannyń eksporttyq-kredıttik agenttigi 600 mlrd teńgege eksporttyq jobalardy qoldaýdy josparlap otyr. Jobalardy kapıtaldandyrý jetkiliksiz bolǵan jaǵdaıda, QIC qoldaý kórsetedi. Osylaısha, «Báıterek» tobynyń barlyq qarjy quraldary bıznesti qoldaýda birin-biri tolyqtyryp, atalǵan sektorlardy qoldaıdy, - dedi Rýstam Qaraǵoıshın.

Aıta keteıik, Úkimet otyrysynda ekonomıkany odan ary ártaraptandyrý tásilderi pysyqtaldy.