Báıterek ekonomıka salalaryn qoldaýǵa 8 trln teńge qarjy bólmek
ASTANA. KAZINFORM — Oljas Bektenov Báıterek holdınginiń dırektorlar keńesiniń otyrysyn ótkizdi: 2025 jyly ekonomıkany qoldaý kólemi eki esege ósti. Bul týraly Úkimettiń baspasóz qyzmeti habarlady.
Premer-mınıstr Oljas Bektenov «Báıterek» Ulttyq ınvestıtsııalyq holdıngi» AQ dırektorlar keńesiniń otyrysyn ótkizdi, onyń barysynda 2025 jylǵy ınvestıtsııalyq saıasatty oryndaý qorytyndylary, sondaı-aq ekonomıkanyń basym baǵyttaryn odan ári qarjylandyrý máseleleri qaraldy.
Otyrysty ashqan Premer-mınıstr dırektorlar keńesiniń múshelerin jáne shaqyrylǵandardy Qazaqstannyń jańa Konstıtýtsııasynyń qabyldanýymen quttyqtap, oqıǵanyń tarıhı mańyzdylyǵyn atap ótti.
— Qazaqstan óziniń saıası, áleýmettik-ekonomıkalyq jáne qoǵamdyq damýynyń jańa kezeńine aıaq basty. Bizdiń barlyǵymyzdy elimizdiń Ata zańynda ornyqqan qaǵıdattardy, normalar men postýlattardy júzege asyrý boıynsha úlken jumystar kútip tur, — dep atap ótti Oljas Bektenov.
«Báıterek» UIH basqarma tóraǵasy Rýstam Qaraǵoıshınniń málimetinshe, 2025 jyly enshiles uıymdar arqyly ekonomıkanyń shıkizattyq emes salalaryn qarjylandyrý kólemi 8 trln teńgeni qurady, bul aldyńǵy jylǵy deńgeıden 96%-ǵa joǵary. 7,1 trln teńge somasyndaǵy qoldaý shamamen 75 myńǵa kompanııa men uıymdarǵa kórsetildi. Holdıngtiń kómegine ıe bolǵan kásiporyndardyń eksport kólemi 1,9 trln teńgege jetti, bul 2024 jylǵy kórsetkishten eki ese kóp.
Jıynda agroónerkásip keshenin qoldaýǵa basa nazar aýdaryldy. 2025 jyly AÓK-ti qarjylandyrý 1,4 trln teńge bolyp, ótken jylmen salystyrǵanda 31%-ǵa artty. Holdıngtiń kómegimen 11,5 myńnan astam aýyl sharýashylyǵy tehnıkasy satyp alyndy. Holdıng qyzmetiniń nátıjesinde 10 myńnan astam jańa jumys orny ashyldy.
Memleket basshysynyń Aqmola oblysyndaǵy egin jınaý naýqany máseleleri jónindegi jıynda bergen tapsyrmasyn oryndaý sheńberinde 2026 jylǵy egis naýqanyn erte qarjylandyrý boıynsha jumys jalǵasýda. Dırektorlar keńesi «Agrarlyq nesıe korporatsııasy» arqyly kóktemgi dala jáne egin jınaý jumystaryn qarjylandyrý úshin 300 mlrd teńgege deıin oblıgatsııalar shyǵarýdy maquldady. Sondaı-aq otandyq óndiristegi aýyl sharýashylyǵy tehnıkasynyń lızıngin 150 mlrd teńgege deıin qarjylandyrý QazAgroQarjy arqyly jáne áleýmettik osal toptar men kezekte turǵan azamattar úshin 100 mlrd teńgege deıin ıpotekalyq nesıeleýdi Otbasy bank arqyly júzege asyrý maquldandy.
2026 jyly «Báıterek» holdıngi ekonomıka salalaryn qoldaýǵa 8 trln teńgege deıin baǵyttaýdy josparlap otyr.
Basym baǵyttardyń qatarynda ónerkásip pen ınfraqurylymdy qarjylandyrý, agrosektordy qoldaý, eksportty damytý jáne halyqty qoljetimdi turǵyn úımen qamtamasyz etý bar.
Premer-mınıstr Oljas Bektenov ekonomıkanyń naqty sektoryn qoldaýdy odan ári kúsheıtýdiń, shıkizattyq emes salalardy damytýdyń jáne Holdıng quraldarynyń tıimdiligin qamtamasyz etýdiń mańyzdylyǵyn atap ótti.
Jıyn qorytyndysy boıynsha 2025 jylǵy IV toqsanǵa arnalǵan táýekelder boıynsha konsolıdatsııalyq esep, korporatıvtik basqarýdy jetildirý is-sharalary josparyn oryndaý nátıjeleri jáne 2025 jylǵa arnalǵan dırektorlar keńesiniń qyzmetin baǵalaý nátıjeleri de maquldandy.
Aıta ketelik «Báıterek» ónerkásip salasyndaǵy jobalardy 120 mlrd dollar somasyna deıin qarjylandyrmaq.
