«Báıterek» dırektorlar keńesi men QR Premeri aldynda esep berdi
ASTANA. QazAqparat - «Báıterek» Ulttyq basqarýshy holdıngi» AQ basshylyǵy dırektorlar keńesiniń aldynda 2014 jyldyń alǵashqy jartysyndaǵy kompanııalar tobynyń qyzmet nátıjeleri týraly esep berdi. Keńes otyrysy QR Premer-Mınıstri Kárim Másimovtiń tóraǵalyǵymen ótti, dep habarlady holdıngtiń baspasóz qyzmeti.
Dırektorlar keńesi múshelerine usynylǵan, aýdıt júrgizilmegen aldyn ala derektemelerge sáıkes, 6 aıdyń qorytyndylary boıynsha holdıng aktıvteriniń kólemi 2 113 449 mln.teńgeni qurady. Bul rette, holdıng tabysy 73 775 mln. teńgeni, al taza kiristiń kórsetkishteri - 11 851 mln. teńge qurady.
Jartyjyldyqtyń qorytyndylary boıynsha «Báıterek» kompanııalary tobynyń basty oqıǵalary: «Qazaqstan - 2050» strategııasyn iske asyrýǵa baǵyttalǵan holdıngtiń 2014 - 2023 jyldarǵa arnalǵan Damý strategııasyn bekitý, óńdeý ónerkásibindegi shaǵyn jáne orta bıznesti qoldaý jónindegi baǵdarlamany iske qosý, EKSPO-2017 baǵdarlamasy sheńberinde jyljymaıtyn múlik obektileriniń qurylysyn qarjylandyrýdyń tetigin aıqyndaý, memlekettik-jeke áriptestik jobalaryn súıemeldeý ortalyǵyn qurý, sondaı-aq halyqaralyq reıtıng agenttiginen BBB+ (boljamy turaqty) kredıttik reıtıngisin alý bolyp tabylady.
Holdıngtiń enshiles uıymdary 32,7 mlrd.teńge somasyna 7179 turǵyn úı zaımdaryn berdi, 54,3 mlrd. teńge somasyna 15 jobany qarjylandyrdy, quny 46,8 mlrd. teńgeni quraıtyn 6 jobany paıdalanýǵa berdi, 1,7 mlrd. teńge somasyna 17 eksporttyq operatsııany qoldady. Mysaly, mynadaı jobalar qarjylandyryldy: «Toyota» lıtsenzııasy boıynsha avtokólik óndirisin keńeıtý, Aqtóbe qalasynda rels-bórene zaýytynyń qurylysy, Qostanaı qalasynda surypty prokat shyǵarý zaýyty, sonymen qatar, úı qurylysy kombınattaryn uıymdastyrý boıynsha lızıngtik mámileler, transformator shyǵaratyn zaýytty jańǵyrtý jáne qýattylyǵyn ulǵaıtý jáne t.b.
Óz kezeginde, Dırektorlar keńesi Qazaqstan Respýblıkasy Ulttyq qorynan bólingen qarajatty paıdalaný týraly aqparatty qarastyrdy. Búgingi kúni 13 ekinshi deńgeıdegi bankter jalpy somasy 71 473 mln. teńgege óńdeý ónerkásibindegi shaǵyn jáne orta bıznes sýbektileriniń 290 jobasyn maquldady.
Dırektorlar keńesiniń otyrysynda 2013 jyl úshin holdıngtiń basqarma tóraǵasy men músheleri qyzmetiniń túıindi kórsetkishter kartalarynyń nátıjeliligi bekitildi.
Dırektorlar keńesi holdıngtiń korporatıvtik shıelenisti jáne múddelik shıelenisti retteý saıasatyn, sondaı-aq holdıngtiń aqparattyq qaýipsizdik saıasatyn bekitti.
