«Báıterek development» jalǵa beriletin 240 myń sharshy metr baspana saldy
ASTANA. QazAqparat - «Nurly jer» memlekettik baǵdarlamasynyń negizgi operatorlarynyń biri «Báıterek development» AQ «Báıterek» Holdınginiń qarjylyq qatysýymen 2017 jyldyń 6 aıynda eldiń ár óńirinde 240,2 myń sharshy metr turǵyn úıdi paıdalanýǵa berdi.
Kompanııanyń baspasóz qyzmetinen málim etkendeı, qurylys qarqyny Ońtústik Qazaqstan jáne Atyraý oblystarynda saqtalǵan. Bıylǵy jarty jylda Shymkent pen Atyraý qalalarynda paıdalanýǵa 40,5 myń. sharshy metr turǵyn úı nemese sáıkesinshe, 672 jáne 677 páter berildi.
Qurylys kóleminiń birshama artýy Mańǵystaý oblysynda belgilendi. Aqtaýdyń turǵyn úı qory jarty jylda 34.2 myń sharshy metr nemese 540 páterge ósti. Batys Qazaqstan oblysy Oral qalasynda jyl basynan 30,2 myń sharshy metr (504 páter), Pavlodar oblysynda 28,2 myń sharshy metr (504 páter) turǵyn úı paıdalanýǵa berildi.
«Bıyl memlekettik baǵdarlama boıynsha salynyp jatqan turǵyn úıler qurylysynyń qarqyny 2016 jylmen salystyrǵanda eki ese ósti. Byltyrǵy jyldyń alǵashqy alty aıynda 128,8 myń sharshy metr baspana qoldanysqa berilse, 2017 jyldyń dál osyndaı merziminde - 240,2 myń sharshy metrdi qurady», - dep habarlady «Báıterek development» AQ basqarma tóraǵasynyń orynbasary Tóleýbek Іlııasov.
Málim etilgendeı, aǵymdaǵy jyldyń ekinshi jartysynda 150 myń sharshy metr aýmaqtaǵy 12 turǵyn úı qurylysyn aıaqtaý josparlanýda.
Aıta keteıik, negizgi ınvestor bolyp tabylatyn «Báıterek development» AQ-nyń páterleri «Qazaqstan qurylys jınaq banki» AQ salymshylaryna jalǵa berý arqyly ákimshilikte kezekte turǵandarǵa beriledi.
