«Báıterek DEVELOPMENT» isi boıynsha fıgýranttardy tutqyndaý merzimi uzartyldy
ASTANA. QazAqparat - «Báıterek DEVELOPMENT» boıynsha is fıgýranttaryn tutqyndaý merzimi uzartyldy. Bul týraly Astana qalalyq soty «QazAqparat» tilshisiniń saýalyna bergen jaýabynda habarlady.
«2017 jylǵy 6 naýryzda Astana qalasy Almaty aýdandyq №2 soty kúdikti B. Jaqsybaevtyń qamaýda ustaý merzimin 2017 jylǵy 30 sáýirge deıin uzartty. Osy sotta kúdiktiler B. Aıtymbetov, D. Anarbaı, A. Jaqypov, B. Esmuhanov, A. Komarov, G, Sarıev, K. Smaǵulovtyń ta qamaýda ustaý merzimderi uzartyldy», - delingen habarlamada.
Eske salsaq, 2017 jylǵy 2 aqpanda Astana qalasy Almaty aýdany №2 soty kúdiktiler: memlekettik jáne jeke áriptestik dırektsııasy departamentiniń basshysy B.B. Aıtymbetov, burynǵy jáne qazirgi basqarýshy dırektor Anarbaı men Sarıev, «Project City Group» basshylyǵy Smaǵulov, Esmuhanov, Jumanazar, Komarov, «Báıterek Development» AQ basqarmasynyń tóraǵasy Jaqypovtyń qamaýda ustaý merzimin 2017 jylǵy 30 naýryzǵa deıin uzartty.
Tergeý nusqasy boıynsha AQ burynǵy tóraǵasy (sońǵy jumys orny - QR UEM «Qazaqstandyq TKSh jańǵyrtý jáne damytý ortalyǵy» AQ basqarmasynyń tóraǵasy) Baqyt Jaqsybaev qylmystyq shemanyń uıymdastyrýshysy bolyp tabylady. «Ol rólder men alynǵan parany bólip otyrǵan. 2016 jylǵy 30 qarashada oǵan qatysty sot sanktsııasymen qamaýda ustaý bultartpaý sharasy qabyldandy», - dep habarlady Sybaılas jemqorlyqqa qarsy is-qımyl ulttyq bıýrosy.
Ustalǵandar «Nurly jol» membaǵdarlamasy aıasynda óńirlerde jaldamaly turǵyn úı salý boıynsha qyzmetterdi satyp alý kezinde qurylys kompanııalarynyń múddelerin qoldaǵany úshin asa iri kólemde júıeli túrde para alǵany úshin aıyptalýda. 13 kásiporyn tartylǵan qylmystyq shema respýblıkanyń barlyq aýmaǵyndaǵy, Oral, Kókshetaý, Atyraý, Aqtóbe, Taraz, Taldyqorǵan qalalaryndaǵy qurylys nysandary boıynsha júrgizilgen.
