«Báıterek Development» AQ jemqorlyqpen kúres sharalaryn jarııa etti
ASTANA. QazAqparat - 2016 jylǵy maýsymda «Báıterek Development» AQ «Nurly Jol» Memlekettik baǵdarlamasy boıynsha obektilerdiń qurylysyna qatysty qujattardyń ótý rásimin zerdeleýge jáne taldaýǵa kiristi. Sharttardy jasasý kezinde «deldaldyq» qyzmetter usyný túrindegi problemalardyń bolýy jóninde qurylys salýshylardyń shaǵymdaryna baılanysty kompanııa qabyldanatyn sheshimderdiń aıqyndylyǵyn qamtamasyz etýdiń jańa algorıtmin ázirledi, dep habarlady «Báıterek» Ulttyq basqarýshy holdıng» AQ baspasóz qyzmeti.
Aǵymdaǵy jyldyń 21 qyrkúıeginde «Báıterek Development» AQ Astana qalasynda 44 qurylys kompanııasynyń ókilderimen keńes ótkizdi. Onyń barysynda qurylys salýshylardyń barlyq ótinishteri, atap aıtqanda, páter ne aqshalaı syıaqy úshin memlekettik baǵdarlamaǵa qatystyrýǵa ýáde beretin «keńesshilerdiń» bolýyna shaǵymdar egjeı-tegjeıli talqylandy.
Óz kezeginde, kompanııa merdigerlerdi jemqorlyqtyń tipti shaǵyn faktilerine tózbeıtindigin, mámileler jasaý kezinde sheshimderdi qabyldaýda ashyq tásildi qoldanatynyn, sondaı-aq arnaıy jedel baılanysty iske qosatynyn málimdedi.
«Báıterek Development» AQ adam faktoryn jáne sybaılas jemqorlyqty boldyrmaý maqsatynda barlyq sheshýshi bıznes-protsesterdi avtomattandyrýǵa kiristi.
Búgingi kúni «Báıterek Development» AQ keńsesinde kelissózder júrgizý úshin áınekti kabınet jabdyqtaldy jáne ol kelissózderdi jazatyn barlyq qajetti aýdıo, beıne apparatýramen jaraqtandyrylǵan. Qyzmetkerlerge beıtarap jerde resmı kelissózderdi júrgizýge tyıym salynǵan.
Jobalardy qaraý men irikteý, shart talaptaryn oryndaý bıznes-protsesteriniń, aqy tóleý, turǵyn úıdi paıdalanýǵa berý, sondaı-aq jalǵa beriletin jáne nesıelik turǵyn úıdi satý jáne bólý rásimderiniń tehnıkalyq kartalary ázirlendi jáne engizildi. Bul kartalardy «Báıterek Development» AQ-nyń resmı saıtynan ashyq kórýge bolady.
