«Baıterek Development» AQ isiniń fıgýranttaryn qamaýda ustaý taǵy 1 aıǵa uzartyldy
ASTANA. QazAqparat - «Baıterek Development» AQ isine qatysy bar tulǵalardy qamaýda ustaý merzimi 17 mamyrǵa deıin uzartyldy, dep habarlaıdy QazAqparat.
QazAqparattyń resmı saýalyna oraı Astana qalasy Almaty aýdanynyń №2 aýdandyq soty kúdikti Aslan Jaqypovty (basqarma tóraǵasynyń orynbasary), Baýyrjan Áıtimbetovti (Memlekettik jáne jekemenshik seriktestigi dırektsııasy departamentiniń jetekshisi), Ǵazız Sarıevti (basqarýshy dırektor), Dılrýh Anarbaevty (burynǵy basqarýshy dırektory) tutqynda ustaý merziminiń uzartylǵandyǵyn málim etti.
Sonymen qatar «Project City Group» JShS-niń jetekshileri Smaǵulov, Esmuqanov, Jumanazar men Komarovty da qamaýda ustaý merzimi uzartylǵan.
30 sáýirge deıin AQ-nyń burynǵy tóraǵasy Baqyt Jaqsybaev ta (sońǵy jumys orny - QR Ulttyq ekonomıka mınıstrliginiń «Qazaqstandyq turǵyn úı-kommýnaldyq sharýashylyǵyn damytý men jańǵyrtý ortalyǵy» AQ-nyń basqarma tóraǵasy) tutqynda bolady.
Esterińizge sala ketsek, 2016 jyldyń qarashasynan bastap «Baıterek DEVELOPMENT» AQ basshylyǵyna qatysty para alý faktileri boıynsha tergeý amaldary bastaldy. Atalǵan azamattardyń barlyǵyna «Nurly jol» memlekettik baǵdarlamasynyń aıasynda óńirlerde jalǵa beriletin turǵyn úılerdiń qurylysyn júrgizý úshin qajetti memlekettik qyzmetterdi satyp alý kezinde qurylys kompanııalaryna basymdyq bergeni úshin júıeli túrde asa iri kólemde para aldy degen aıyp taǵylyp otyr. Osyǵan deıin habarlanǵanyndaı, 13 kásiporyn tartylǵan qylmystyq shema respýblıkanyń barlyq aımaqtary: Oral, Kókshetaý, Aqtóbe, Taraz, Taldyqorǵan qalalary boıynsha júzege asyrylǵan.
