«Báıterek» alańynan alǵashqy zymyran 2026 jyldyń 1-toqsanynda ushyrylady
ASTANA. KAZINFORM – Baıqońyrdaǵy «Báıterek» alańynan alǵashqy zymyran 2026 jyldyń 1-toqsanynda ushyrylady. Bul týraly búgin jyl qorytyndysyna oraı BAQ ókilderimen kezdesken Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev aıtty.
- Baıqońyrdaǵy «Báıterek» ushyrý alańyn qarqyndy túrde daıyndap jatyrmyz. Bul bizdiń – Qazaqstannyń menshikti ushyrý alańy. Onda orta jáne aýyr sanattaǵy zymyran tasymaldaǵyshtardy ushyrý júzege asyrylady. Qazirgi ýaqytta qarqyndy daıyndyq júrgizilip jatyr, zymyran tasymaldaǵysh Qazaqstan aýmaǵynda. Kelesi jyldyń 1-toqsanynda alǵashqy synaq ushyrylymy júzege asyrylady dep kútemiz, - dedi vıtse-premer.
Sonymen qatar ol 2030 jylǵa deıin asa jeńil sanattaǵy zymyran tasymaldaǵyshtardy qurastyrý baǵdarlamasy júzege asyrylyp jatqanyn aıtty.
- Ǵaryshqa táýelsiz shyǵý úshin ózimizdiń zymyran tasymaldaǵyshymyzdy ázirleý maqsatynda bul baǵdarlamany kezeń-kezeńmen damytyp jatyrmyz. Al bul ǵaryshtyq derjavanyń belgisi, - dedi Jaslan Mádıev.
Buǵan deıin Nıgerııa men Kongo Qazaqstannan spýtnık satyp alý úshin aldyn ala tólem jasaǵanyn jazǵan edik.