«Báıterek» AQ enshiles kompanııalary ekonomıka sektorlaryn qalaı qoldaýda

ASTANA. QazAqparat – «Báıterek» ulttyq basqarýshy holdınginiń enshiles kompanııalary el ekonomıkasynyń túrli sektory boıynsha qandaı qoldaý kórsetip jatyr. Bul týraly «Aktobe Investment-2022» VII ınvestıtsııalyq halyqaralyq forýmda atalǵan ulttyq holdıngtiń basqarýshy dırektory Nııaz Kóshkimbaev aıtyp berdi, dep habarlaıdy QazAqparat tilshisi.

Bizdiń holdıng 8 enshiles kompanııadan turady. Holdıngtiń negizgi enshiles kompanııalarynyń biri 8 mıllıard AQSh dollary mólsherinde aktıvi bar «Qazaqstannyń Damý banki». Atalǵan bank «jasyl» jáne jańartylatyn energetıka salasy boıynsha, sol sııaqty uzaq merzimdi ınvestıtsııalyq jobalardy qarjylandyrýǵa basymdyq beredi.

Sondaı-aq, «Báıterek» holdıngi «Qazyna Kapıtal Menedjment» AQ-nyń qorlary arqyly aktsıonerlik jáne venchýrlyq qarjylandyrýdy júzege asyrady. Onyń portfeline kapıtaly 3,1 mlrd AQSh dollary quraıtyn 19 tikeleı ınvestıtsııalar qory kiredi.

Shaǵyn jáne orta bıznes «Damý» qorynan qarjylyq qoldaý ala alady.

Biz eksporttyq kelisimsharttar men kredıtterdi jáne ımporttaýshylardy saqtandyrýdy, jalpy eksporttaýshylardy qoldaý men qorǵaýǵa arnalǵan quraldardyń keń spektrin «KazakhExport» eksporttyq saqtandyrý kompanııasy arqyly júzege asyramyz.

«Otbasy bank» AQ jáne «Qazaqstandyq turǵyn úı kompanııasy» AQ sııaqty enshiles kompanııalar turǵyn úı qurylysyna jeńildetilgen ıpotekalyq nesıe beredi.

«Bereke bank» AQ bul kommertsııalyq uıym. Onyń zamanaýı ınfraqurylymy men kásibı komandasy (shamamen 4 myń qyzmetker) bar. Bank klıentter men bıznestiń suraýyn qanaǵattandyrý úshin eń úzdik ónimder men qyzmetterdi usynady. Atalǵan sharalar eldiń qarjy júıesi úshin mańyzy zor.

Bizdiń enshiles uıymymyz «Agrarlyq kredıttik korporatsııasy» egin jınaý jumystary men ınvestıtsııalyq jobalardy qarjylandyryp, qarjy ınstıtýttary qoryn qurady. «Agrarlyq kredıttik korporatsııasy» 10 jylǵa deıingi merzimge jáne óteýdiń 36 aıǵa deıingi jeńildikpen jáne 6% syıaqy mólsherlemesimen (sýbsıdııalaýdy eskere otyryp) 2 myń AQSh dollary somasynda qaryz usyna alady.

Agrarlyq kredıttik korporatsııanyń enshiles kompanııasy – «QazAgroQarjy» elimizdegi eń iri lızıngtik kompanııa. Aýyl sharýashylyǵy tehnıkasy men jabdyqtary lızıngi naryǵynyń shamamen 90%-y tıesili. Kompanııa fermerlerge jeńildetilgen sharttarmen aýylsharýashylyq tehnıkasy men jabdyqtaryn lızıngke alýǵa kómektesedi.

«Іsker qoǵamdastyq ókilderin aýqymdy ınvestıtsııalyq jobalardy iske asyrý úshin holdıngtiń qarjy ınstıtýttarynyń qolda bar quraldaryn paıdalanýǵa shaqyrǵym keledi. «Báıterek» óz kezeginde bıznes ókilderiniń iskerlik bastamalary boıynsha senimdi seriktes bolýǵa jáne qarjylandyrý boınsha ǵana emes, sonymen qatar jobalardy qurylymdaýda da qoldaý kórsetýge daıyn»,- dep tolyqtyrdy Nııaz Kóshkimbaev.