«Báıterek» 9 aıda ekonomıkaǵa 8,7 trln teńgege qoldaý kórsetti – Qaraǵoıshın

ASTANA. KAZINFORM – «Báıterek» ulttyq basqarýshy holdıngi bıyl toǵyz aıda ekonomıkaǵa 8,7 trln teńgege qoldaý kórsetti. Bul jyldyq jospardyń 90 paıyzyna teń. Bul týraly Úkimet otyrysynda holdıng basqarma tóraǵasy Rýstam Qaraǵoıshın málimdedi.

«Báıterek» Holdıngi jańa makroekonomıkalyq turaqtandyrý baǵdarlamasyn iske asyrýda negizgi rólge ıe bolmaq
Foto: UEM

Onyń aıtýynsha, kórsetilgen qoldaýdyń 6,5 trln teńgesi kásipkerlik blokqa tıesili.

– Sondaı-aq, holdıng metallýrgııa, hımııa ónerkásibi, mashına jasaý, agroónerkásiptik keshen, óńdeý ónerkásibi salasyndaǵy iri kásiporyndarǵa, atap aıtqanda, Qarmet 875 mlrd teńge, «Qazaqmys» 326 mlrd teńge, Qazaq Kalium 193 mlrd teńge qoldaý kórsetti. Sonymen qatar qoldaý holdıngtiń damý ınstıtýttary arqyly shaǵyn jáne orta kásipkerlik sýbektilerine de kórsetilip jatyr, – dedi ol.

Buǵan qosa, jeńil avtomobılder, bolat, qubyrlar, vagondar, jaǵarmaı, gofrokarton shyǵaratyn óndiristik jobalarǵa da qoldaý kórsetilgen. Olar boıynsha maquldanǵan qarajatty ıgerý jalǵasyp jatyr.

Holdıng Qazaqstan turǵyn úı kompanııasy men Qazaqstannyń damý banki arqyly «Energetıkalyq jáne kommýnaldyq sektorlardy jańǵyrtý» ulttyq jobasyn qarjylandyrýǵa da qatysady.

– Onyń ishinde 554 mlrd teńgege 221 joba boıynsha jumys júrgizilip jatyr, 356 mlrd teńgege 153 jobaǵa qol qoıyldy, 244 mlrd teńgege 144 joba qarjylandyryldy, – dedi basqarma tóraǵasy.

Otandyq óndirýshilerdi qoldaý

Rýstam Qaraǵoıshın qazaqstandyq taýar óndirýshilerdiń ónimderin satýǵa da qoldaý kórsetilip jatqanyn atap ótti. Onyń dereginshe, QazAgroQarjy bergen aýyl sharýashylyǵy tehnıkasynyń lızıngi 374 mlrd teńge boldy. Onyń ishinde 330 mlrd teńgesi nemese 88 paıyzy qazaqstandyq tehnıkaǵa berilgen. Atap aıtqanda, traktorlarǵa 133 mlrd teńge, kombaındarǵa 126 mlrd teńge, ózge de tehnıkalarǵa 71 mlrd teńge bólindi.

– Sondaı-aq Ónerkásipti damytý qory 416 mlrd teńgege tehnıkany tolyqtaı qazaqstandyq óndirýshilerden satyp aldy. Olardyń qatarynda vagondar – 192 mlrd teńgege, avtobýstar – 68 mlrd teńgege, arnaıy tehnıka – 113 mlrd teńgege, ózge de tehnıkalar – 43 mlrd teńgege bar. Al Qazaqstannyń eksporttyq-kredıttik agenttigi arqyly 570 mlrd teńge somasyna 86 eksporttaýshyǵa qoldaý kórsetildi, – dedi ol.

4,7 trln teńgelik 30 joba Investıtsııalyq keńeske usynylady

Basqarma tóraǵasynyń aıtýynsha, holdıng qazir ınvestıtsııalyq qyzmetti de júzege asyryp jatyr.

– 24 qarashada ótetin Investıtsııalyq keńestiń qaraýyna 4,7 trln teńgeni qajet etetin 30 jobalyq joba daıyndalyp jatyr. Onyń ishinde 243 mlrd teńgege ımport almastyrý boıynsha 6 joba, 329 mlrd teńgege eksportqa baǵdarlanǵan 7 joba, 1,3 trln teńgege ımport almastyrý jáne eksport boıynsha 5 joba, 2,8 trln teńgege 12 iri ınfraqurylymdyq joba bar, – dedi Rýstam Qaraǵoıshın.

Sonymen qatar jańa óndirister úshin «ınvestıtsııalarǵa tapsyrys» jobalar pýly qalyptastyrylǵan. Onda 7,6 trln teńgege 282 joba bar.

Búginde holdıngtiń enshiles uıymdary 777 mlrd teńgege 48 jobany qarjylandyryp jatyr. Onyń ishinde 34,5 mlrd teńgege 44 joba agroónerkásiptik keshenge, 727 mlrd teńgege 2 joba taý-ken metallýrgııa keshenine, 15,8 mlrd teńgege 2 joba mashına jasaý salasyna tıesili.

Atap aıtqanda, agroónerkásiptik keshen jobalary sút ónimderi, qant, qant qyzylshasy, jem, jumyrtqa, qus eti, et ónimderi, maı jáne maıly daqyldar óndirisin qamtıdy. Al taý-ken metallýrgııa keshenindegi jobalar mys kenderi men bolat ónimderine, mashına jasaý salasyndaǵy jobalar temirjol quıý jáne jylý almasý jabdyqtaryna qatysty.

Importty almastyrýǵa basymdyq beriledi

Ol holdıngtiń elishilik qundylyqtyń analıtıkalyq avtomattandyrylǵan júıesin ázirlegenin aıtty. Bul júıe qazaqstandyq taýar óndirýshilerdiń tizilimimen, sondaı-aq «Samuryq-Qazyna» AQ men Qarjy mınıstrliginiń satyp alý platformalarymen ıntegratsııalanǵan.

Onyń túsindirýinshe, Ónerkásip jáne qurylys mınıstrligimen ıntegratsııa jobalardy taldaý kezinde qarsy mindettemelerdiń ádil kólemin anyqtaýǵa múmkindik beredi.

– Investıtsııalyq jobalardy qarastyrǵan kezde, «Báıterek» holdınginiń kompanııalary jobany iske asyrýǵa qajet taýarlardyń atalǵan jobalarda bolýyna saraptama júrgizedi. Nátıjesinde, qaryz shartynda otandyq taýar óndirýshilerden taýarlardy, jumystardy jáne qyzmetterdi satyp alý týraly ádil qarsy mindettemelerdi belgileıdi, – dedi ol.

Sonymen qatar «Samuryq-Qazyna» AQ-men jáne Qarjy mınıstrligimen ıntegratsııa kvazımemlekettik jáne memlekettik kompanııalardyń turaqty suranysyn anyqtaýǵa múmkindik beredi.

Jalpy qajettilikti qazaqstandyq óndirýshiler tizilimimen salystyrý nátıjesinde ımportty almastyratyn salalar anyqtalady. Buryn Qazaqstan aýmaǵynda óndirilmegen ónimdi jergilikti jerde damytý jáne qarjylandyrýda dál osy jobalarǵa basymdyq beriledi.

Importty almastyrý úshin memlekettik jáne kvazımemlekettik sektorlardyń turaqty suranysy eskerilip, óńdeý ónerkásibiniń 22 salasy boıynsha 861 ónim túri qamtylǵan.

Budan bólek, holdıng klıentter óndirgen taýarlar katalogyn jasaǵan. Onda 526 qazaqstandyq óndirýshiniń 2 385 taýary bar.

– Osylaısha, holdıng qazirgi klıentterine jańa jobalardyń ónimderin usynady. Aǵymdaǵy jyldyń sońyna deıin taýarlar sanyn 3 500 pozıtsııaǵa jetkizý josparlanyp otyr. Holdıng katalog taýarlaryn Qazaqstandyq taýar óndirýshilerdiń tizilimine engizý boıynsha tıisti jumys júrgizip jatyr, – dedi basqarma tóraǵasy.

Onyń málimetinshe, toǵyz aı ishinde holdıngtiń jasalǵan satyp alý sharttary boıynsha elishilik qundylyq 71 paıyz bolǵan.

Rýstam Qaraǵoıshın qazaqstandyq óndiristi qoldaý júıesi jobanyń barlyq kezeńin qamtıtynyn atap ótti. Jobalardyń ıdeıasy memlekettik jáne kvazımemlekettik sektorlardyń ımportqa degen turaqty suranysy, energetıkalyq jáne kommýnaldyq sektorlardy jańǵyrtý jónindegi ulttyq joba men holdıngtiń ınvestıtsııalyq dırektsııalarynyń suranysy negizinde qalyptasady.

Investıtsııa kezeńinde qarjylandyrýmen birge qazaqstandyq óndirýshilerden satyp alý boıynsha qarsy mindettemeler qabyldanady, sondaı-aq holdıngtiń klıentteri tartylady. Al ónimdi paıdalaný kezeńinde ishki naryqtaǵy lızıng, eksportty qoldaý jáne holdıngtiń klıentterine ónimdi usyný arqyly taýarlardy ótkizýge járdem kórsetiledi.

Aıta keteıik, Úkimet otyrysynda otandyq taýar óndirýshilerdi qoldaý máselesi qaraldy.