«Báıterek» 5 jylda syrttan 20 trln teńge qaryz alady – Úkimet saǵaty
ASTANA. KAZINFORM – Ulttyq ekonomıka mınıstriniń orynbasary Arman Qasenov Senattaǵy Úkimet saǵatynda «Báıterek» holdınginiń ekonomıkany nesıelendirýdegi úlesi týraly derekterdi atady.
Investıtsııalardyń JІÓ-degi deńgeıin qazirgi kúıde (14-15%) saqtaı alsaq, 2029 jylǵa qaraı jıyntyq ınvestıtsııa 240 mlrd dollarǵa deıin barady. Biraq 2029 jyly ınvestıtsııanyń JІÓ-degi deńgeıin 23%-ǵa deıin jetkizý úshin 85 mlrd dollar qosymsha ınvestıtsııa qalyptastyrý kerek, - dedi vıtse-mınıstr.
Arman Qasenov bul sharýany «Báıterek» holdıngi tyndyra alatynyn atap ótti.
- Dál osy maqsatpen memlekettik damý ınstıtýttarynyń kapıtalyn jyl saıyn 1 trln teńgemen tolyqtyryp otyrý usynylǵan bolatyn. 2025 jyly «Báıterek» memleketten 500 mlrd teńge aldy. Al Senat depýtattarynyń qoldaýynyń arqasynda bul soma aldaǵy 3 jylǵa 1 trln teńgeden bolyp bekitildi. Memlekettiń «Báıterekke» bergen ár trıllııon teńgesine 7 trln teńgeden qaryz tartylady. Sonda 1/7 qaǵıdatymen qaryz tartylady, - dedi ol.
Vıtse-mınıstr bul qaryzdyń teń jartysy ishki naryqtan teńgemen alynsa, qalǵany syrtqy naryqtan sheteldik valıýtamen alynatynyn atap ótti.
- Bul ınstıtýttardyń ekonomıkaǵa jyl saıyn 8 trln teńgege deıin qarjy quıýyna múmkindik týǵyzady. Osylaısha «Báıterek» aldaǵy 5 jylda 40 trln teńgedeı qarjy tartady. Qazirdiń ózinde holdıngtiń portfelinde 18 trln teńgeniń jobasy bar. Bul tsıfr ótinim túsken saıyn óse beredi, - dedi Arman Qasenov.
Buǵan deıin Báıterek ekonomıka salalaryn qoldaýǵa 8 trln teńge qarjy bóletini aıtylǵna bolatyn.
