«Báıterek» 1 mlrd dollarlyq úsh daıyn jobany bankterge beredi
ASTANA. KAZINFORM – «Báıterek» holdınginiń basqarma tóraǵasy Rýstam Qaraǵoıshın Senattaǵy Úkimet saǵatynan keıin BAQ ókilderine jalpy quny 1 mlrd dollar bolatyn úsh ónerkásiptik joba bankterge beriletinin aıtty.
-Qazir biz shamamen 1 mlrd dollardyń jobalaryn berý jóninde mámileler daıyndap jatyrmyz. Onyń syrtynda 3,5 mlrd dollarlyq portfel ázirlep boldyq, - dedi «Báıterek» basshysy.
Rýstam Qaraǵoıshın 1 mlrd dollardyń úsh jobasy daıyn, ınvestıtsııalyq kezeńi aıaqtalǵan jobalar ekenin aıtty.
- ıAǵnı bular – zaýyttar men fabrıkalar. Sondyqtan bul jobalar paıdalanýǵa berilip, belgili bir qarjylyq aǵyn ákele bastady. Sondyqtan ekinshi deńgeıli bankter úshin bul senimdi qaryz alýshy, - dedi ol.
Búgingi Úkimet saǵatynda «Báıterek» 5 jylda syrttan 20 trln teńge qaryz alatyny málim boldy.
