«Baıtaqtyń» 18 úmitkerden turatyn partııalyq tizimi tirkeldi
«Qazaqstannyń «Baıtaq» jasyldar partııasy 18 adamnan turatyn partııalyq tizimdi usyndy. Bul tizimdegi 7 kandıdat áıelder, jastar jáne múgedektigi bar adamdar. Olar kandıdattardyń jalpy sanynyń 38,9 paıyzyn quraıdy. Ortalyq saılaý komıssııasy ókiletti memlekettik organdarmen birlesip, Májilis depýtaty bolyp saılaný úshin partııalyq tizimge engizilgen adamdardyń Konstıtýtsııa men «Saılaý týraly» Konstıtýtsııalyq zańnyń talaptaryna sáıkestigine tekserý júrgizdi. Partııalyq tizimge engizilgen barlyq adam Konstıtýtsııanyń jáne «Saılaý týraly» Konstıtýtsııalyq zańnyń talaptaryna sáıkes keledi», - dedi OSK múshesi Sábıla Mustafına.
Onyń atap ótýinshe, partııalyq tizimdi usynǵan partııalar partııalyq tizimge engizilgen árbir adam úshin QR zańnasynda belgilengen eń tómengi jalaqynyń 15 eselengen mólsherinde OSK shotyna saıası partııalardyń qarajatynan saılaý jarnasyn engizedi.
«2021 jylǵy qańtarda ótken Parlament Májilisi depýtattarynyń saılaýyna «Baıtaq» partııasy qatysqan joq. Osyǵan baılanysty «Baıtaq» partııasy 19 adamǵa 18 mln 900 myń teńge saılaý jarnasyn tolyq tóledi», - dedi ol.
Osydan keıin Ortalyq saılaý komıssııasynyń músheleri Qazaqstannyń «Baıtaq» jasyldar partııasy qoǵamdyq birlestiginen Parlament Májilisi depýtattyǵyna kandıdattardyń QR Konstıtýtsııasynda jáne «Saılaý týraly» Konstıtýtsııalyq zańda olarǵa qoıylatyn talaptarǵa sáıkestigin anyqtaý týraly, «Baıtaq» partııasynyń partııalyq tizimin tirkeý týraly hattamaǵa qol qoıdy.
Esterińizge sala keteıik, «Baıtaq» jasyldar partııasy saılaýǵa usynǵan 24 kandıdattyń tizimimen myna siltemede tanysa alasyz.
