«Baıtaq» partııasynyń kandıdattar tizimi nege qysqardy
ASTANA.KAZINFORM — «Baıtaq» jasyldar partııasy bastapqyda sezde 51 kandıdatty usynǵan. Alaıda Ortalyq saılaý komıssııasyna 47 kandıdattyń tizimi tapsyryldy. Osyǵan baılanysty partııa tóraǵasy Azamathan Ámirtaev Ortalyq saılaý komıssııasynda ótken brıfıngte túsinikteme berdi.
— Biz respýblıkalyq partııa bolǵandyqtan elimizdiń barlyq óńirin, aýdandary men oblystaryn qamtımyz. Quryltaıǵa úmitker bolýǵa nıet bildirgen azamattardan kóp ótinish kelip tústi. Solardyń arasynan iriktep, partııanyń besinshi sezinde 51 kandıdatty bekittik. Keıin jeke jaǵdaılaryna baılanysty tórt úmitker ótinish jazyp, kandıdatýralaryn qaıtaryp aldy. Sonyń nátıjesinde bekitilgen kandıdattar sany 47 boldy, — dedi Azamathan Ámirtaev jýrnalıster suraǵyna.
Onyń málimetinshe, 47 kandıdattyń ishinde 13 ekolog bar. Sondaı-aq eki gıdrotehnık, jer máselelerimen aınalysatyn mamandar, ekologııalyq aýrýlar salasynda eńbek etetin eki dáriger jáne ekologııa máseleleri boıynsha jumys isteıtin segiz zańger bar. Budan bólek, kandıdattar qatarynda beske jýyq kásipker, túrli mamandyq ıeleri jáne eki kópbalaly ana usynylǵan.
Aıta keteıik, Qazaqstan Respýblıkasy Ortalyq saılaý komıssııasy «Baıtaq» jasyldar partııasy qoǵamdyq birlestiginiń partııalyq tizimin tirkedi.
