«Baıtaq» partııasy saılaý qorytyndysyn qabyldaıtynyn málimdedi
ASTANA. KAZINFORM — «Baıtaq» jasyldar partııasynyń óńirlik fılıaldarynyń ókilderi ekzıtpol qorytyndysy boıynsha jarııalanǵan Quryltaı saılaýynyń aldyn ala nátıjelerine qatysty pikir bildirdi.
Batys Qazaqstan, Qaraǵandy jáne Aqtóbe oblystaryndaǵy partııa ókilderi azamattardyń tańdaýyn moıyndaıtynyn jáne saıası jumysty jalǵastyratynyn málimdedi. Sonymen qatar olar saılaý nátıjelerin taldap, partııa ishindegi jumys tásilderin jańartý qajettigin atap ótti.
«Baıtaq» partııasy Batys Qazaqstan oblystyq fılıalynyń jetekshisi Tursynbek Baıtemirov Facebook-tegi paraqshasynda vıdeoúndeý jarııalap, saılaýshylardyń tańdaýyna qurmetpen qaraıtynyn jáne jarııalanǵan aldyn ala nátıjelerdi qabyldaıtynyn aıtty.
— Aldaǵy ýaqytta búgingi nátıjeni eskere otyryp, óz ustanymymyz ben baǵdarlamamyzdy júzege asyrýdy jalǵastyramyz. Qorshaǵan ortany qorǵaý, taza sý men taza jer máseleleri boıynsha naqty sheshimder qabyldanýyna kúsh salamyz. Jumysymyzdy jetildirip, kelesi saılaýǵa daıyndalamyz, — dedi Baıtemirov.
Ol partııany qoldaǵan azamattarǵa alǵys aıtyp, «Baıtaqtyń» óz jumysyn jalǵastyratynyn atap ótti.
Partııanyń Qaraǵandy oblystyq fılıalynyń jetekshisi Seıfýl-Málik Qazıtov saılaý nátıjelerine synı turǵydan baǵa berdi. Onyń aıtýynsha, ekzıtpol kórsetkishteri partııa kútken nátıjeden tómen bolǵan. Alaıda «Baıtaq» saılaýshylardyń tańdaýyn moıyndap, daýys berý qorytyndysyn qabyldaıdy.
Qazıtov Quryltaıǵa ótken partııalarǵa azamattardyń senimin aqtap, tıimdi jumys isteýin tiledi. Onyń aıtýynsha, Quryltaıdaǵy jumys qoǵam aldynda úlken jaýapkershilikti talap etedi.
Sonymen qatar ol partııa ishinde ishki taldaý júrgizýge shaqyrdy. Onyń pikirinshe, saılaý naýqany barysynda «Baıtaqtyń» barlyq múmkindigi tolyq paıdalanylmaǵan jáne partııanyń keıbir ıdeıalaryn saılaýshylarǵa jetkizýge múmkindik bolmaǵan.
Qazıtov partııanyń basqarý júıesin reformalap, partııa tóraǵasyn rotatsııalaý qajettigin aıtyp, partııa múshelerin uıymdy jańǵyrtý jumysyna belsendi qatysýǵa shaqyrdy.
Aqtóbe oblystyq fılıalynyń jetekshisi Aıman Seksenova da ekzıtpol nátıjeleri «Baıtaq» partııasy kútken kórsetkishten tómen bolǵanyn aıtty.
Onyń sózinshe, óńirdegi saılaý ýchaskelerinde partııa atynan 200-den astam baıqaýshy jumys istegen. Seksenova saılaýdyń ádil ótkenin aıtyp, partııa azamattardyń tańdaýyn qabyldaıtynyn málimdedi.
Ol Quryltaıda ókildik etý quqyǵyna ıe bolǵan saıası kúshterge tıimdi jumys istep, saılaýshylardyń senimin aqtaýǵa tilektestik bildirdi.
Sonymen birge Seksenova saılaý nátıjeleri partııanyń ishki jumys tásilderin qaıta qaraýǵa sebep bolýy kerek dep sanaıdy. Ol partııanyń saılaýaldy baǵdarlamasyn taldap, ony partııa múshelerimen birge talqylaýdy usyndy. Sondaı-aq «Baıtaq» múshelerin partııany jańǵyrtý jumysyna belsendi qatysýǵa shaqyrdy.
Osylaısha, «Baıtaq» partııasynyń úsh óńirlik fılıalynyń ókilderi saılaýdan keıin de saıası qyzmetti jalǵastyratyndaryn málimdedi. Qaraǵandy jáne Aqtóbe oblystarynda partııa ishindegi ózgerister men jumys tásilderin qaıta qaraý qajettigi ashyq aıtylsa, Batys Qazaqstan oblysynda ekologııalyq máselelerge basymdyq berip, aldaǵy saıası jumysqa daıyndyqty jalǵastyrýǵa mán berildi.
Buǵan deıin «Ádilet» partııasynyń tóraǵasy Aıbek Dádebaı saılaý qorytyndysy boıynsha saılaýshylarǵa úndeý jasady.
Sondaı-aq Respublica partııasy exit poll nátıjelerine qatysty pikir bildirdi.
«Aýyl» partııasynyń tóraǵasy Qaırat Aıtýǵanov saılaýdyń ashyq ári uıymdasqan túrde ótkenin atap ótti.
Jalpyulttyq sotsıal-demokratııalyq partııasynyń tóraǵasy Ashat Raqymjanov saılaýdyń alǵashqy nátıjesine pikir bildirip, halyqtyń senim mandatyna ıe bolǵandaryn aıtty.
Sonymen qatar «Aq jol» partııasynyń tóraǵasy Danııa Espaeva saılaý nátıjesine qatysty málimdeme jasap, saılaý ashyq ári ádil ótkenin alǵa tartty.
Qazaqstannyń Halyq partııasynyń tóraǵasy Nursultan Shoqanov saılaý qorytyndysyna qatysty úndeý jasady.
