«Baıtaq» partııasy 51 kandıdattan turatyn partııalyq tizimdi bekitti
ASTANA. KAZINFORM — Astanada «Baıtaq» Qazaqstan jasyldar partııasynyń kezekten tys V sezi ótti. Jıynda partııanyń jańartylǵan saılaýaldy platformasy qabyldanyp, Qazaqstan Respýblıkasy Quryltaıy depýtattyǵyna usynylatyn 51 kandıdattyń tizimi bekitildi.
Sezde partııa Jarǵysyna ózgerister engizilip, «Qazaqstan — ómir súrýge qolaıly el!» atty saılaýaldy platforma biraýyzdan maquldandy. Qujatta ekologııa memlekettik saıasattyń negizgi baǵyttarynyń biri retinde qarastyrylyp, ony ekonomıkamen, áleýmettik salamen, densaýlyq saqtaýmen, bilim berýmen, qala damýy jáne memlekettik basqarý júıesimen sabaqtastyrý kózdelgen.
Partııa ókilderiniń aıtýynsha, baǵdarlama eldegi ózekti máselelerdi sheshýge arnalǵan naqty tetikterdi qamtıdy. Saılaýaldy mindettemelerdiń oryndalýyn qoǵamdyq baqylaý arqyly baǵalaý tetigi de engizilgen.
Sezdiń basty sheshimderiniń biri — 2026 jylǵy 23 tamyzda ótetin Qazaqstan Respýblıkasy Quryltaıy depýtattarynyń saılaýyna qatysatyn partııalyq tizimdi bekitý boldy. Ashyq daýys berý nátıjesinde delegattar belsendi óńirlik kóshbasshylardan, ǵalymdardan, tájirıbeli mamandar men ekolog-sarapshylardan quralǵan 51 kandıdattyń tizimin qoldady.
Partııa tóraǵasy Azamathan Ámirtaı jańa Konstıtýtsııanyń qabyldanýy eldiń saıası júıesin jańǵyrtýdaǵy mańyzdy kezeń ekenin atap ótti.
— Jańa Konstıtýtsııa men birpalataly Quryltaıǵa kóshý búkil saıası júıege jańa talap qoıyp otyr. Qoǵam búginde qur ýáde emes, naqty nátıje kútedi. «Baıtaq» partııasy bul saılaýǵa kásibı mamandar komandasymen jáne ekologııalyq baǵyttaǵy daıyn ESG-jobalarymen qatysady. Ekologııalyq qaýipsizdik, taza sý men ult densaýlyǵy árbir azamattyń negizgi konstıtýtsııalyq quqyǵy bolýy tıis. Búginnen bastap partııanyń óńirlerdegi saılaýaldy shtabtary tolyqqandy jumysqa kirisedi, — dedi ol.
Partııa málimetinshe, Quryltaı depýtattyǵyna usynylǵan kandıdattardyń qujattary zańnamada belgilengen tártippen jýyq arada Ortalyq saılaý komıssııasyna joldanady.
Buǵan deıin Quryltaı depýtattaryn saılaýǵa qatysatyn kandıdattar tizimin ózge saıası partııalar da bekitken bolatyn. Atap aıtqanda, «Aýyl» partııasy — 69, «Aq jol» demokratııalyq partııasy — 63, Qazaqstan halyq partııasy — 72, Respublica partııasy — 76, al Jalpyulttyq sotsıal-demokratııalyq partııasy 33 kandıdatty usyndy.
