Baısýfınov: Vengrııamen oıynda Qazaqstan óz fýtbolyn kórsetýge tyrysady
ASTANA. KAZINFORM – Qazaqstan quramasynyń bas bapkeri Talǵat Baısýfınov 9 maýsymda ótetin Vengrııaǵa qarsy joldastyq match qarsańynda komanda daıyndyq deńgeıi men aldaǵy oıynǵa qatysty pikir bildirdi, dep habarlaıdy Kazinform tilshisi.
Bas bapkerdiń aıtýynsha, Armenııamen ótken kezdesýde jattyqtyrýshylar shtaby jas fýtbolshylarǵa múmkindik bergen jáne olar senimdi aqtaǵan.
– Armenııamen ótken matchta jas oıynshylarǵa basymdyq berdik. Olardyń arasynda ulttyq qurama sapynda alǵash ret alańǵa shyqqandar da boldy. Barlyǵy ózderiniń daıyn ekenin kórsete aldy. Bul bizdi qýantady. Degenmen alda atqarylatyn jumys áli kóp ekenin jaqsy túsinemiz, – dedi Talǵat Baısýfınov match aldyndaǵy baspasóz máslıhatynda.
Ol Vengrııa quramasynyń qazirgi deńgeıine de toqtaldy.
– Vengrııa búgingi tańda sapaly fýtbol kórsetip júr. Jańa bapker kelgennen keıin komanda nátıjege umtylyp keledi. Bul – óte myqty qarsylas. Bizdiń fýtbolshylar úshin paıdaly tájirıbe bolady. Vengrııa quramasynyń múmkindikterin jaqsy bilemiz. Soǵan qaramastan óz oıynymyzdy kórsetýge tyrysamyz, – dedi bas bapker.
Qazaqstan men Vengrııa quramalary arasyndaǵy joldastyq kezdesý 9 maýsym kúni ótedi. Match Astana ýaqytymen saǵat 21:50-de bastalady. Oıyn tikeleı efırde Qazsport telearnasynan kórsetiledi.
– Vengrııa – jaqsy uıymdasqan ári qarqyny joǵary komanda. Biz óz múmkindigimizdi paıdalanyp, jankúıerlerimizdi jaqsy oıynmen qýantýǵa tyrysamyz, – dedi Talǵat Baısýfınov.
Aıta keteıik, fýtboldan Ózbekstan quramasy Nıderlandyǵa qarsy joldastyq match ótkizedi.
