Baısýfınov Qazaqstan-Vengrııa matchyna qatysty pikir bildirdi
ASTANA. KAZINFORM – Qazaqstan ulttyq quramasynyń bas bapkeri Talǵat Baısýfınov Vengrııaǵa qarsy joldastyq kezdesýden keıin oıyn týraly pikirin aıtty, dep habarlaıdy Sports.kz.
Qazaqstan quramasy kezdesýde esep ashqanymen, match sońynda 1:3 esebimen jeńilip qaldy.
– Bul jerde bári oıynshylardyń ishki túısigi men minezine baılanysty. Alańǵa shyqqan fýtbolshylardyń basym bóligi Armenııamen ótken matchqa da qatysqan edi. Ol oıyn da óte qarqyndy jáne tartysty boldy. Búgin jigitterdiń jeńilistiń ornyn toltyrýǵa degen qulshynysy baıqaldy. Olar match boıy bizdiń oıyn josparyn oryndaýǵa tyrysty. Kez kelgen komanda match sońynda gol soǵýǵa múmkindik týǵanda, ózin dáleldeýge umtylady. Sondyqtan men oıynshylardy toqtatqan joqpyn, – dedi Baısýfınov.
Eske salaıyq, Qazaqstan quramasy kezdesýde alǵash bolyp esep ashty. Qorǵaýshy Sergeı Malyı mergendik tanytyp, ulttyq quramany alǵa shyǵarǵan bolatyn.
Alaıda ekinshi taımda alań ıeleri úsh gol soǵyp, jeńisti julyp áketti. Vengrııa quramasy sapynan Domınık Soboslaı, Andrash Shefer jáne Raımýnd Tot kózge tústi.
Osylaısha, joldastyq kezdesý Vengrııa quramasynyń 3:1 esebindegi jeńisimen aıaqtaldy.
