Baısat bazary Almaty qalasynyń kommýnaldyq menshigine ótýi múmkin
ASTANA. KAZINFORM — Qaırat Satybaldyǵa tıesili bolǵan «Baısat» bazarynyń áli kúnge deıin satylmaýyna suranystyń tómendigi sebep bolýy múmkin. Bul týraly Ortalyq kommýnıkatsııalar qyzmetinde ótken brıfıngte QR Qarjy mınıstrligi Memlekettik múlik jáne jekeshelendirý komıtetiniń tóraǵasy Nurmahan Ádilbekov málim etti.
Brıfıng barysynda jýrnalıster bir jyldan beri saýdaǵa shyǵarylǵan «Baısat» bazarynyń ne sebepti satylmaı jatqanyn jáne satyp alýshy tabylmaǵan jaǵdaıda onyń taǵdyry qandaı bolatynyn surady.
— Onyń satylmaı jatqanynyń negizgi sebebi suranystyń nemese ınvestorlarda jetkilikti qarjynyń bolmaýy shyǵar. Eger nysan aldaǵy ýaqytta da satylmasa, meniń oıymsha ony Almaty qalasy ákimdiginiń kommýnaldyq menshigine berý máselesi qarastyrylýy múmkin, — dedi Nurmahan Ádilbekov.
Komıtet tóraǵasynyń aıtýynsha, jalpy satylmaı jatqan nysandardyń negizgi sebebi — suranystyń tómendigi. Barlyq múlik ashyq formatta elektrondyq saýda alańynda satylymǵa shyǵarylyp otyr.
Aıta keteıik, Almatyda «Baısat» bazary úshinshi ret satylymǵa shyǵaryldy.
Sonymen qatar Almatydaǵy «Baısat» bazaryna satyp alýshy taǵy tabylmaǵanyn jazǵanbyz.
