«Baısary» qoı tuqymy memlekettik deńgeıde moıyndaldy
ASTANA. KAZINFORM — Túrkistan, Jambyl jáne Almaty oblystarynda «Baısary» qoı tuqymynyń selektsııalyq jetistikterine memlekettik aprobatsııa júrgizildi. Nátıjesinde eki tuqymishilik tıp pen qoshqarlardyń eki zaýyttyq jelisi memlekettik deńgeıde tanylyp, patent aldy, dep habarlaıdy Aýyl sharýashylyǵy mınıstrligi.
Mınıstrlik buıryǵyna sáıkes, AÓK-tegi memlekettik ınspektsııa komıtetiniń memlekettik komıssııasy «Baısary» tuqymynyń selektsııalyq jetistikterin baǵalady. Jumystardy ǵylymı jáne uıymdastyrýshylyq turǵydan Etti-maıly baǵyttaǵy qoı sharýashylyǵy respýblıkalyq palatasy súıemeldedi.
Túrkistan oblysynyń Báıdibek, Saıram, Saryaǵash aýdandary men Arys qalasy aýmaǵynda Túrkistan tuqymishilik tıpi baǵalandy. Birqatar sharýa qojalyǵy men kásiporynda barlyǵy 7,3 myńǵa jýyq joǵary ónimdi qoı tekserildi.
— Aprobatsııa tikeleı asyl tuqymdy sharýashylyqtarda júrgizilip, mal basy men negizgi ónimdilik kórsetkishteri baǵalandy. Túrkistan oblysynda Túrkistan tuqymishilik tıpiniń 7,3 myńǵa jýyq joǵary ónimdi mal basy zertteldi, — dep atap ótti mınıstrlikte.
Sonymen qatar № 00452 «Mıllıon» jáne № 5042 «Depýtat» qoshqarlarynyń eki zaýyttyq jelisi baǵalandy. «Mıllıon» jelisiniń negizin qalaǵan qoshqardyń tiri salmaǵy 231 kelige jetken. Bul kórsetkish Qazaqstannyń rekordtar kitabyna engizilgen.
Jambyl jáne Almaty oblystarynda Jetisý tuqymishilik tıpine jatatyn 3,5 myńnan astam qoı aprobatsııadan ótti. Jambyl oblysynda jumystar Qordaı, Shý, Merki jáne T. Rysqulov aýdandarynda, al Almaty oblysynda Qarasaı aýdany men Qonaev qalasyndaǵy sharýashylyqtarda júrgizildi.
«Baısary» qoıy etti-maıly baǵyttaǵy tuqymǵa jatady. Eresek asyl tuqymdy qoshqarlardyń tiri salmaǵy 140–180 keli bolsa, jekelegen maldyń salmaǵy 200 keliden asady. Soıys shyǵymy 53–56%-dy quraıdy.
Memlekettik synaqtar men aprobatsııa nátıjesinde tórt selektsııalyq jetistik resmı túrde tanylyp, patent aldy. Olar — № 1292 Jetisý tuqymishilik tıpi, № 1293 Túrkistan tuqymishilik tıpi, № 1294 «Mıllıon» zaýyttyq jelisi jáne № 1295 «Depýtat» zaýyttyq jelisi.
Alynǵan nátıjeler aldaǵy ýaqytta «Baısary» qoı tuqymynyń ónimdiligi men selektsııalyq qasıetterin jetildirýge baǵyttalǵan asyl tuqymdyq jumystarda paıdalanylmaq.
Aıta keteıik, ǵalymdar asyl tuqymdy buqalardyń ósimtaldyǵyn arttyrýǵa arnalǵan bıoqospaǵa patent aldy.
