Baıpaq basatyn aqtóbelik sheber shákirt izdeıdi
AQTÓBE. QazAqparat - Aqtóbe oblysy, Oıyl aýdanynyń turǵyny Amanturly Satybaldın baıpaq basyp shyǵardy. Sheber jún jýyp, tútetin adamdardy jumysqa alady, dep habarlaıdy QazAqparat tilshisi.
Aqtóbeniń Oıyl aýdanynda turatyn Amanturly Satybaldın taıaýda jún óńdeý tsehyn iske qosty. Ol jún qabyldap, jýyp, tútip, keıin baıpaq basyp shyǵarady. Bıznes jobasymen 1,5 mıllıon teńge qaıtarymsyz grant utyp aldy.
«Buryn júndi qabyldap, býyp-túıip, Aqtóbe qalasyna jiberetin edik. Qazir júnniń bári qoqysta jatyr, sharýalar jaz ben kúzde qoı qyrqyp, onyń júnin qaıda tapsyraryn bilmeıdi. Keıin aýdan ákimdigi jún óńdeý sharýashylyǵyn usyndy. Bul qolymnan keletin is bolǵan soń jún óńdeý tsehyn ashtym. Sharýashylyqty qyzym Gaýhar Satybaldına úılestirip otyr, men shebermin. Qazir eki adamdy jumysqa aldym. Biri jún jýady, ekinshisi jún tútedi. Jumysty jedeldetý úshin bizge jún tútý apparaty qajet boldy. Buryn qoldanysta bolǵan quraldy satyp alyp, jóndep jatyrmyn»,- dedi aqtóbelik sheber Amanturly Satybaldın.
Sheber 20 jyl buryn baıpaq basýdy úırenip, toqyraý kezinde baıpaq basýdy qolǵa alǵan. Keıin suranys bolmady, kásip toqtady. Al qazir suranys kóbeıdi. Kóbine qarııalar men ańshylar tapsyrys beredi.
«Jún - tabıǵı ónim. Ázirge qoı júnin qabyldap jatyrmyn. Aýylda qylshyqty jún kóp. Odan kıiz, baıpaq basamyn. Aldaǵy ýaqytta kıiz úı jasaǵym keledi. Qysta jyly, jazda salqyn qazaqtyń kıiz úıine eshteńe jetpeıdi dep esepteımin. Al bııazy júnnen shulyq toqıdy. Bári densaýlyqqa paıdaly. Ásirese býyny syrqyraıtyn qarııalar jıi kelip, tapsyrys beredi. Júnnen zamanaýı dúnıeler jasaýǵa bolady. Dızaınerlermen baılanys bar. Men shıkizatty daıyndaımyn, olar kamzol, sómke tigedi. Kórpe de jasalady»,- dedi A.Satybaldın.
Elimizge jún tútetin apparattar Qytaıdan ákelinedi. Jańasy qymbat, eskisi jóndeýdi qajet etedi. Eskini alyp, jóndeýdi bastaǵan sheber barlyǵy 7 ólshemmen baıpaq basady. Bári eki qoldyń kúshimen daıyndalady.
Aıta keteıik, Amanturly Satybaldın ázirge óńirde baıpaq basýdy qolǵa alǵan jalǵyz kásipker. Júnniń ıisinen qashatyn jastardyń baıpaq basýdy úırenýge degen qulshynysy da baıqalmaıdy.
«Kóbi jaıly kreslo men jaqsy jalaqyny qajet etedi. Men ózim baıpaq basamyn, biraq shákirt qajet. Buryn bir jigitti úırettim. Ol da qazir bul isti tastady. Ázirge men dep kelgen adamdy kórmedim. Ózim 70 jastan astym, bilgenimdi jastarǵa úıretkim keledi»,- dedi ol.
