Baılyqtyń mádenıeti qandaı bolýy kerek
ASTANA. KAZINFORM — Іri baılarǵa salyqty arttyrý — ádilettiń ǵana emes, mádenıettiń de máselesi. Bul pikirdi Quryltaı depýtaty Aıdos Sarym aıtty.
— Mysaly Eýropadaǵy mıllıarderlerdiń bireýiniń atyn bilesiz be? Áıtpese Nıderlandydaǵy, Germanııadaǵy mıllıarderler sany Reseıdegi baılardan kóp. Bireýiniń de atyn bilmeımiz. Esesine Qazaqstannyń mıllıarderlerin jatqa bilemiz. Toı-tomalaǵyna qandaı juldyzdy qandaı aqshaǵa shaqyrǵanyn bilemiz. Munyń jurttyń qytyǵyna tıetinin de bilemiz, — dedi depýtat.
Onyń aıtýynsha, túptiń túbinde osynyń barlyǵy izet tanytý, mádenıet tanytýǵa kelip tireledi.
— Ótkende Belgııa Koroldiginen júz shaqty kásipker keldi. Olardyń kıimine nazar aýdaryńyzshy. Eshbir altyndatylǵan kostıým kórmedim, bári — qarapaıym, kúndelikti kııýge yńǵaıly pıdjaktar. Bul da — baılyqtyń mádenıeti. Biz bir jaǵynan mal shashpaqty salyqtyq turǵydan shektesek, ekinshi jaǵynan mádenı jumystar da qatar júrgizilip otyrýy kerek, — dedi Aıdos Sarym.
Depýtattyń aıtýynsha, aýqatty baılarǵa qarapaıym azamattar alyp otyrǵan járdemaqydan bas tartý usynylǵan. Nátıjesinde kóptegen iri kásipkerler járdemaqydan óz erkimen bas tartyp jatyr.
Eske sala ketsek, búgin Prezıdent Qasym-Jomart Toqaev baılarǵa salyqty kóterýdi usyndy.
Úkimet pen Quryltaı osy máseleni zerdelep, tıisti usynystar engizýge tıis.
