Baılar tóleıdi: Brazılııada orta tap tabys salyǵynan tolyq bosatylady

ASTANA. KAZINFORM — Brazılııa depýtattary Prezıdent Lýla da Sılvanyń orta tapty tabys salyǵynan bosatý jónindegi mańyzdy bastamasyn maquldady, dep habarlaıdy BFMTV.

Bıýdjetke túsetin shyǵyndy óteý úshin baı azamattarǵa salynatyn salyq mólsherin tórt ese arttyrý kózdelip otyr.

Qabyldanǵan zań jobasyna sáıkes, aılyq tabysy 5 000 realdan (shamamen 800 eýro) aspaıtyn azamattar tabys salyǵyn múlde tólemeıtin bolady. Buǵan deıin bul shekti tabys 3 000 realdy (shamamen 480 eýro) quraǵan.

Úkimettiń málimetinshe, eger bastama tolyq júzege assa, 2026 jylǵa qaraı shamamen 16 mıllıon brazılııalyq bul salyqty tóleýden bosatylady.

Bıýdjet shyǵynyn óteý úshin aı saıyn 50 000 realdan (shamamen 7 995 eýro) joǵary tabys tabatyn azamattarǵa salynatyn salyq tórt ese ósedi.

Qazir bul sanattaǵy shamamen 140 myń adam tabys salyǵy retinde orta eseppen 2,5% tóleıdi. Jańa tártip boıynsha olardyń salyǵy birtindep 10%-ǵa deıin artady.

Prezıdent Lýlanyń bul bastamasy el ishindegi qoldaýdyń negizgi faktoryna aınalǵanymen, ótken jyly qarjy naryǵy tarapynan teris qabyldanyp, ulttyq valıýta — realdyń tarıhı qunsyzdanýyna alyp kelgen bolatyn.

Aıta keteıik, bıyl shilde aıynda AQSh prezıdenti Donald Tramp Brazılııadan ımporttalatyn taýarlar men qyzmetterge kedendik baj salyǵyn 50%-ǵa deıin arttyrý týraly jarlyqqa qol qoıǵan edi.