Baılar da ınvestıtsııaǵa táýeldi: 7 mıllıarderdiń kapıtaly azaıdy
ASTANA.KAZINFORM — Jyl basynan beri Batys Azııadaǵy qaqtyǵysqa baılanysty kúsheıgen geosaıası shıelenis álemdik ekonomıkaǵa aıtarlyqtaı áser etti. Nátıjesinde, Bloomberg mıllıarderler ındeksine sáıkes, álemdegi eń baı 10 adamnyń jeteýiniń jalpy baılyǵy 214 mıllıard dollarǵa azaıyp qalǵan. Bul týraly Anadoly agenttigi jazdy.
Jyl basynda jahandyq naryqtarda oń dınamıka baıqalǵanymen, Irandaǵy narazylyqtar, AQSh-tyń Venesýelaǵa áskerı aralasýy, Qytaı men Japonııa arasyndaǵy dıplomatııalyq daǵdarys jáne AQSh-tyń Grenlandııany anneksııalaý múmkindigi týraly áńgimeler sııaqty geosaıası shıelenister ınvestorlardy alańdatyp otyrdy.
Shıelenis eń sońynda 28 aqpanda AQSh pen Izraıldiń Iranǵa jasaǵan soqqylarynan keıin órshı tústi. Bul oqıǵa Batys Azııadaǵy iri qaqtyǵysqa ákelip, Tegeran tarapynan jaýap sharalary baıqaldy. Sol sátten beri naryqtarǵa qysym úzdiksiz áserin tıgizip keledi.
Nátıjesinde, 2026 jyldyń basynan beri álemdegi eń baı 10 adamnyń jeteýiniń baılyǵy 214 mıllıard dollarǵa qysqarsa, qalǵan 3 mıllıarderdiń baılyǵy 43,6 mıllıard dollarǵa artty.
Bernar Arnonyń baılyǵy 55,4 mıllıard dollarǵa azaıdy
Jyl basynan beri eń úlken shyǵyn frantsýz sán brendteriniń ıesi Bernar Arnoǵa tıisti boldy – onyń baılyǵy 55,4 mıllıard dollarǵa azaıyp, 153 mıllıard dollarǵa jetti.
Amerıkalyq tehnologııalyq kompanııa Oracle-diń negizin qalaýshy Larrı Ellıson da baılyǵyn 52,4 mıllıard dollarǵa qysqartty – 195 mıllıard dollarǵa deıin. Meta kompanııasynyń ıesi Mark Tsýkerberg baılyǵy 30,5 mıllıard dollarǵa tómendep, 203 mıllıard dolarynan aıyryldy.
Amazon kompanııasynyń negizin qalaýshy Djeff Bezostyń baılyǵy 23,3 mıllıard dollarǵa qysqarsa, Google-diń birlesken negizin qalaýshylary Larrı Peıdj – 21,9 mıllıard dollarǵa, Sergeı Brın – 20,4 mıllıard dollaryn joǵaltty. Álemdegi eń qymbat kompanııa – Nvidia-nyń bas dırektory Djensen Hýangtyń baılyǵy 10,1 mıllıard dollarǵa tómendedi.
Ilon Mask baılyǵyn arttyrdy
Eń qyzyǵy álemdegi eń baı adam Ilon Mask kerisinshe basqa mıllıarderlerden erekshelenip, baılyǵyn 24,2 mıllıard dollarǵa arttyryp, tabysy 644 mıllıard dollarǵa jetken.
Walmart saýda jelisiniń negizin qalaýshy Semıýel Ýoltonnyń urpaqtary Djım Karr Ýolton pen Semıýel Robson Ýolton ta baılyqqa keneldi. Djım Karr Ýoltonnyń kapıtal ósimi 9,8 mıllıard dollardy, al Semıýel Robson Ýoltonnyń – 9,7 mıllıard dollardy qurady.
Buǵan deıin Qytaı qaıtadan álemdegi mıllıarderler sany boıynsha kóshbasshy atanǵanyn jazǵan edik.
