Baılanys jáne aqparat mınıstrligi jaqyn aralyqta Parlamentke sheteldik BAQ qyzmetin retteýge baǵyttalǵan zań jobasyn usynbaqshy
ASTANA. 10 jeltoqsan. QazAqparat /Qanat Mámetqazyuly/ -Jaqynda Parlamentke «Teleradıohabar taratý týraly» zań jobasy usynylady. Onda negizinen Qazaqstanǵa habar taratatyn sheteldik BAQ qyzmeti retteletini kózdelip otyr.
Búgin QR Parlamenti Cenatynyń jalpy otyrysynda «Qazaqstan Respýblıkasynyń keıbir zańnamalyq aktilerine baılanys máseleleri boıynsha tolyqtyrýlar engizý týraly» zań jobasyn talqylaý barysynda Baılanys jáne aqparat mınıstri Asqar Jumaǵalıev osylaı málim etti.
«Aqparattyq qaýipsizdik, onyń ishinde ulttyq aqparattyq keńistikti qalyptastyrý máselesinde bizdiń mınıstrlik birqatar sharalardy atqarýdy josparlaıdy. Biz osy problemadaǵy jaǵdaıdy zerttedik. Soǵan sáıkes, eger qazirgi tańda Qazaqstannyń ulttyq aqparattyq keńistigi máselesi týraly aıtatyn bolsaq, onda bizdiń ulttyq telearnalarymyzdyń sany ondaı keńistikti qalyptastyrý úshin múldem jetkiliksiz, bar-joǵy 52 ǵana. Al buǵan qarsy sheteldik arnalardyń sany 220-dan asyp ketedi. Budan bólek, shalǵaıdaǵy aýyldar qazirgi tańda habar-oshardy negizinen otandyq BAQ-tan emes, shekaramańy memleketterinen alyp otyr. Shyndyǵyn aıtý kerek, ondaı túkpirdegi aýyl azamattary búgingi memlekettiń tynys-tirshiliginen, ustanǵan baǵytynan, strategııalyq damýynan da beıhabar dese bolady»,- dedi A. Jumaǵalıev.
Mınıstrdiń aıtýynsha, bul rette eń aldymen Qazaqstanda otandyq aqparattyq lekti tutastaı qamtamasyz etý asa ózekti. «Osy maqsatta jerseriktik telehabar taratý jobasy júzege asyrylǵaly otyr. Budan basqa, biz ulttyq aqparattyq keńistikti qalyptastyrý boıynsha jedel sharalardy qolǵa alatyn bolamyz. Sonymen qatar, biz jaqyn aralyqta «Teleradıohabar taratý týraly» zań jobasyn Parlamentke usynbaqshymyz. Onda sheteldik BAQ pen otandyq BAQ-tyń qalaı retteletini qamtylatyn bolady. Negizi búgingi tańda bizdiń qazaqstandyq BAQ-qa qatysty olardyń zań talaptary boıynsha qyzmeti tolyq qamtylyp otyrsa, sheteldikter úshin eshqandaı ereje de, tártip te joq. Osyny eskeretin bolamyz», - dedi mınıstr.
