Baılanys jáne aqparat mınıstriniń tóraǵalyǵymen «Aqparattyq-kommýnıkatsııalyq tehnologııalar salasynda memlekettik tildiń qoldanylýy» taqyrybynda dóńgelek ústel ótti

Respýblıkalyq jáne aımaqtyq BAQ-nyń redaktorlary qatysqan basqosýda www.baq.kz portaly tanystyryldy, dep habarlaıdy atalmysh mınıstrliktiń baspasóz qyzmeti.

«Baq.kz portalyn ázirleýdegi basty maqsat - ınternet jelisinde qazaq tildi BAQ-tardyń saıttaryn kóbeıtý jáne barlyq qazaq tildi buqaralyq aqparat quraldaryn bir portalǵa toptastyrý»,- dep atap ótti Asqar Jumaǵalıev. Mınıstrdiń pikirinshe, osyndaı ortalyqtandyrylǵan katalog qazaq tilindegi aqparattardyń jeli ishinde tez taraýyna yqpal etedi.

Búgingi basqosýǵa otyzdan astam baspasóz aqparat quraldarynyń ókilderi qatysty, basqosý sońynan olarǵa Baq.kz portalymen jumys isteý boıynsha arnaıy semınar uıymdastyryldy.

Kezdesýde qazaq tilin kompıýterlik, aqparattyq baǵdarlamalar ınterfeısterinde qoldaný máselesi de sóz boldy. Sondaı-aq, QR Baılanys jáne aqparat mınıstrliginiń aqparattyq júıeler men baǵdarlamalyq ónimderdiń ınterfeısterin qazaq tiline aýdarýdy talap etý máselesin qarastyryp jatqany belgili boldy.

Asqar Jumaǵalıevtiń pikirinshe, venderler baǵdarlamalardy ázirleýde jáne aqparattyq júıelerdi qalyptastyrýda olardyń ınterfeısterin qazaq tiline aýdarýlary kerek. Kompanııanyń tehnologııalar salasyndaǵy birden bir jetistigi osyǵan da baılanysty bolmaq.

Dóńgelek ústel barysynda mınıstr mobıldi telefondarda qazaq tili qaripteriniń qoldanylýyna basa nazar aýdardy. Búgingi kúni Samsung, Lg jáne Nokia kompanııalary óz telefondaryna qazaq tili qaripterin engizgen. «Qalǵan óndirýshiler osylardan úlgi alýlary kerek», - dep aıtyp ótti dóńgelek ústelge qatysýshylar. Qazaq tilin meńgerip, sol tilde sóıleýshiler sany kún saıyn artyp keledi. Sondyqtan da, qazaq tildi qaripter eskerilgen telefondarǵa suranys ta arta túseri anyq.

Baılanys jáne aqparat mınıstrligi bul máseleni sheship te qoıdy. Qazirgi kúni memlekettik standarttar jobalary ázirlenip, mobıldi telefondarǵa qazaq tilin engizý fýnktsııalary ornatylýda.

QR Baılanys jáne aqparat mınıstrliginiń Baılanys jáne aqparattandyrý komıtetiniń basqarma basshysy Gúlnár Bókeevanyń aıtýynsha, «ázirlenip jatqan memlekettik standarttarda ár túrli standarttaǵy uıaly baılanys abonentteri stansylarynyń negizgi parametrlerine tehnıkalyq talaptar qoıylýda. Atap aıtqanda, qazaq qaripterin kodtaý talaptary jáne olardyń ornalasý rettiligi, habarlamalardy qabyldaý jáne jiberý.»

Jaqyn kúnderi Qazaqstanda qazaq qaripteri qamtylǵan alǵashqy planshettik kompıýter shyǵaryla bastaıdy. Jańa qondyrǵyda qazaq tilindegi qujattardy qabyldaý, hattar jiberý sekildi qyzmetter qarastyrylǵan.

Anyqtama: «www.Baq.kz» -qazaq tildi BAQ-nyń saıttary toptastyrylǵan platforma. Ony «Kazkontent»AQ barlyq aqparattyq resýrstardy biriktirý maqsatynda ázirlegen bolatyn. Tilek bildirgen árbir baspasóz aqparat quraly saıttan óziniń bólimshesin asha alady. Saıttyń negizgi maqsaty - qazaq tildi BAQ-nyń reıtıngin kóterý, Internet jelisindegi qazaq tildi kontent sapasyn jaqsartý.

AO «Kazkontent»- «Zerde» Ulttyq aqparattyq-kommýnıkatsııalyq holdınginiń enshiles kásiporny bolyp tabylady. «Kazkontent» AQ
qurýdaǵy negizgi maqsat -Qazaqstandaǵy basty aqparattyq Internet júıesiniń damyǵan ulttyq segmentin qalyptastyrý, sonyń ishinde jelilik aqparattyq resýrstardy damytý, aqparattyq-kommýnıkatsııalyq ınfraqurylymdy uıymdastyrý, osy saladaǵy ınvestıtsııalyq jáne ınnovatsııalyq belsendilikti kótermeleý bolyp tabylady.