Baılanys jáne aqparat mınıstri poshta qyzmetkerlerin kásibı merekesimen quttyqtady
/strong>Qazannyń 8-i. QazAqparat /Erlik Erjanuly/ - Qazirgi zamanda dástúrli poshta baılanysy óziniń basty mindeti - aqparatty berý men taratýdy júzege asyra otyryp, qala men el, qurlyq pen halyq arasynda baılanystyrýshy býyn bolǵan jáne árdaıym bola beredi.
Bul jaıynda búgin QR Baılanys jáne aqparat mınıstri Asqar Jumaǵalıevtiń poshta qyzmetkerlerin kásibı merekimen quttyqtaǵan hatynda aıtylǵan. Ony mınıstrliktiń Jaýapty hatshysy Qaırat Ábsattarov Almaty poshtamtynyń 150 jyldyq mereıtoıyna arnalǵan saltanatty jıynda oqyp berdi.
"Búkil álemde Dúnıejúzilik poshta kúnin keńinen merekeleý qoǵamymyzdy poshta salasyna qol jetkizýge, salalyq mamandyqty jarııa etýge múmkindik beredi. Ol salalyq mekemeler men uıymdardyń tutynýshylar arasyndaǵy dıalogynyń jańa túrin qalyptastyrady. Búgingi tańda Dúnıejúzilik poshta kúnin óziniń kásibı merekesi sanaıtyn mamandardyń ortasy eleýli túrde keńeıtildi. Respýblıkamyzdyń poshta salasynda jumys jasaıtyndar 22 myń adamǵa jetti", deıdi Asqar Jumaǵalıev. Baılanys jáne aqparat mınıstriniń aıtýynsha, bıylǵy jyly Dúnıejúzilik poshta kúnin merekeleý Almaty poshtamtynyń 150 jyldyq mereıtoımen tuspa-tus kelip otyr. Ol kúnine myńdaǵan adamǵa qyzmet kórsetetin Qazposhta fılıaldarynyń eń iri, ári aldyńǵy qatarly bólimderiniń biri. Almaty poshtamty eki jyl qatarynan reıtıng nátıjeleri boıynsha eń úzdik fılıal korporatıvtik nagradasyn jeńip aldy. Onyń mereıtoıyn qazir Almaty poshtamtynyń ǵana emes, kúlli Qazaqstan poshtasynyń irgetasyn qalaǵan jáne osy salada 30 jyldan astam eńbek etken 430 zeınetker men 65 Uly Otan soǵysyna qatysqan baılanys ardagerleri de toılaýda.
