Baılanys salasynda ınvestıtsııalyq tartymdylyq tıisti deńgeıde emes - QR Básekelestikti qorǵaý agenttigi
ASTANA. Tamyzdyń 4-i. QazAqparat /Rýslan Ǵabbasov/ - Baılanys salasynda ınvestıtsııalyq tartymdylyq tıisti deńgeıde emes. Bul týraly búgin ınterkonnekt salasyndaǵy tarıfterdi retteýdiń halyqaralyq tájirıbesi taqyrybyndaǵy semınarda QR Básekelestikti qorǵaý agenttigi tóraǵasynyń orynbasary Rýstam Aqberdın málim etti.
«2009 jyly, ıaǵnı Qazaqstan ekonomıkasyna aýyr kezeńde Іshki jalpy ónim 1 paıyzǵa ósken edi. Al telekommýnıkatsııa salasy 8 paıyzǵa joǵarylady. Bir jyl buryn aıyrmashylyq eleýli deńgeıde bolatyn. Atap aıtqanda ІJÓ 3 paıyzǵa, baılanys 12,7 paıyz kóleminde ósti»,-dedi ol.
«Osy turǵyda alańdaýǵa esh sebep joq sekildi, alaıda tereńdep zerdelengen taldaýǵa qaraǵanda atalǵan ósim uıaly baılanys segmenti turǵysynda qamtamasyz etilgen. Qalǵan segmentter shamaly ǵana ósimdi kórsetti»,-dedi R. Aqberdın.
Onyń sózinshe, 2009 jyly bul salaǵa baǵyttalǵan ınvestıtsııa kólemi aıtarlyqtaı tómendedi. «2008 jylmen salystyrǵanda ınvestıtsııa deńgeıi 36 paıyzǵa azaıdy»,-dedi
Osy salanyń damý qarqynynyń tómendeýi men ınvestorlardyń nelikten Qazaqstannyń telekommýnıkatsııalyq salasyna belsendi túrde qatyspaı otyrǵany sebebine toqtalǵan R. Aqberdın, «bizdiń paıymdaýymyzsha, osyndaǵy sebepterdiń biri - salanyń negizgi segmenti uıaly baılanys sektorynyń ınvestıtsııalyq tartymdylyǵynyń jetkiliksiz deńgeıde bolýy. Atap aıtqanda, uıaly baılanys sektory bul salanyń lokomotıvi bolyp tabylady, al onyń tartymdylyqqa ıe bolmaı otyrǵany sáıkesinshe, jalpy salaǵa tómen ınvestıtsııalyq qyzyǵýshylyqty qalyptastyryp otyr», dedi. Onyń pikirinshe, ınvestıtsııalyq tartymdylyqtyń tıisti deńgeıde bolmaýyna uıaly baılanys sektoryndaǵy básekelestiktiń tómen deńgeıde qalyptasýy yqpal etýde.
