Baılanys operatory tarıftiń qymbattaý sebebin túsindirdi
Ortalyq kommýnıkatsııalar ortalyǵyndaǵy onlaın baspasóz máslıhatynda moderator suraq qoıdy: «Kóptegen uıaly baılanys operatorlarynda jańa oqý jyly qarsańynda jańa tarıftik josparlar paıda boldy. Meniń bilýimshe, mysaly, «Beeline» kompanııasyndaǵy roýterler men modemder úshin naýryz-sáýir aılarynda 5 500 teńge, al qazir – 8 myń teńge tóleıdi. Activ-tegi «Sýper Komfort M» tarıfi 2390 teńge turdy. Endi bul tarıf 1 qyrkúıekke deıin jaramdy bolyp, áleýmettik jelilerdegi sheksizdik joıyldy. Balalarǵa «Bilim» tarıfi qoldanylady, jeli ishindegi qońyraýlar mınýtyna 18 teńge, al qalǵany aqyly. Buǵan ne aıtasyz?»
Evgenıı Nastradın jańa tarıftik josparlar men ózgermegen eskileri bar ekenin atap ótti.
«Jańa tarıftik josparlarǵa kelsek, atalǵan somadan qoryqpańyzdar. Burynǵy 5 490 teńgelik tarıfti bir qurylǵyda ǵana paıdalanýǵa bolatyn. Al qazirgi 7 990 teńge somasyndaǵy tarıfti bir qurylǵyda ǵana emes, telefonda da paıdalanýǵa bolady. Eki tarıftik jospar úshin artyq tóleýdiń qajeti joq. Biz tarıfterdi jaqsarttyq, ishki jelige sheksiz qońyraýlar qostyq. Eger qosymsha satyp alsa, bul 11 myń teńge bolar edi», - dedi Evgenıı Nastradın.
«Qazaqtelekom» AQ basqarma tóraǵasy Qýanyshbek Esekeevtiń aıtýynsha, áleýmettik jeliler – bilim berý resýrstary bolyp sanalmaıdy. Sondyqtan, olardyń qoljetimdi bolýyn operatorlar tarıfpen belgileıdi.
«Bizdegi naryq básekege toly. Siz «Bilim» tarıfin aıttyńyz, onyń qazaqstandyq bilim berý resýrstaryna qatysy bar. Al áleýmettik jeliler bilim berý resýrstaryna kirmeıdi. Sondyqtan, árıne, olardyń qoljetimdi bolýyn operatorlar tarıfpen belgileıdi. Mundaı suraqtar týyndaýy zańdy. «Bilim» tarıfinde bilim berý resýrstaryn tegin paıdalanýǵa biregeı múmkindik berdik. Árbir oqýshy qazaqstandyq resýrstardy paıdalana alady», - dedi Qýanyshbek Esekeev.
