Baılanys operatorlary «Internet jelisine keń jolaqty qoljetimdilikti damytýdyń Jol kartasyn» maquldady
ASTANA. 6 mamyr. QazAqparat - Baılanys operatorlary QR Baılanys jáne aqparat Vıtse-mınıstri Sáken Sársenovtyń basshylyǵymen ótken Baılanys operatorlary keńesiniń kezekti otyrysynda «Internet jelisine keń jolaqty qoljetimdilikti damytýdyń Jol kartasy» maquldandy,
dep habarlady mınıstrliktiń baspasóz qyzmetinen.
Bul Jol kartasy Memleket basshysynyń 2015 jylǵa qaraı elimizdiń úı sharýashylyqtaryn 100 paıyz sapaly ınternetpen qamtamasyz etý týraly tapsyrmasyn oryndaýǵa baǵyttalǵan. Sonymen birge, baǵdarlama Internet jelisin paıdalanýshylardyń tyǵyzdyǵyn 100 adamǵa eseptegende 45-ke (34,1 - 2011 jyl) deıin arttyrýdy jáne keńjolaqty Internetke qosylý tarıfin 2015 jylǵa qaraı kem degende 30 paıyzǵa tómendetýdi kózdeıdi.
Bul kórsetkishterge qol jetkizý úshin 3G, CDMA-450/800,4G tehnologııalaryn paıdalana otyryp, Internet jelisine symsyz qosylýdy jáne FTTH, FTTB tehnologııalary arqyly jelige tirkelgen baılanys arqyly qosylýdy damytý kerek.
Baǵdarlamada kórsetilgendeı 3G jelisi 10000 nan astam turǵyny bar eldi mekenderdiń barlyǵyna 2014 jylǵa deıin tartylatyn bolady. Al oǵan deıin elimizdiń barlyq aımaǵy CDMA tehnologııasynyń arqasynda keń jolaqty ınternetpen qamtylmaq.
Esterińizge salyp óteıik, osydan bir apta buryn «Qazaqtelekom» AQ Internetke qosylý jyldamdyǵyn 2014 jylǵa deıin qalalyq abonentter úshin 20 Mbıt/s, aýyldyq jerdegi abonentter úshin 10 Mbıt/s ulǵaıtatyndaryn habarlaǵan bolatyn. FTTH jobasyn damytý boıynsha josparlanǵan is-sharalardy júzege asyrý jumystarynyń nátıjesinde 2015 jyldan bastap qalalyq jáne oblys ortalyǵyndaǵy abonentterdiń ınternetke qosylý jyldamdyǵy 100 Mbıt/sqa ( 2014 jyldyń sońynda 120 555 port) jetetin bolady. "Kar-Tel" JShS-niń málimdeýinshe, FTTB tehnologııasynyń arqasynda jyldamdyǵy syrtqy resýrstar úshin 20 Mbıt/s, ishki resýrstar úshin 100 Mbıt/spen qamtamasyz etetin «Internet úıde» dep atalatyn qyzmetti elimizdiń 7 qalasynda (Almaty, Astana, Qaraǵandy, Jezqazǵan, Petropavl, Taraz, Shymkent) iske qosqan.
Aǵymdaǵy jyldyń sáýir aıynda «Digital TV» kompanııasy WiMAX symsyz ınternet abonentteri úshin jelige qosylý jyldamdyǵyn 25%-ǵa, kabeldik ınternetti 50%-ǵa arttyrǵan, biraq baǵasyn ósirmegen.
