Baılanys ortalyǵy aýyl sharýashylyǵy sanaǵy aıasynda 8 myńnan astam ótinish qabyldady

ASTANA. KAZINFORM — Tamyz aıynyń basynan bastap Ulttyq statıstıka bıýrosynyń 1446 baılanys ortalyǵy azamattarǵa Ulttyq aýyl sharýashylyǵy sanaǵyna qatysý máseleleri boıynsha belsendi túrde keńes berip keledi.

1 tamyzdan bastap baılanys ortalyǵyna 10,5 myńnan astam ótinish kelip túsip, onyń 8,4 myńy tikeleı aýyl sharýashylyǵy sanaǵyna qatysty boldy.

Qazirgi tańda sanaq onlaın formatta ótip jatyr. Tamyz aıynyń sońyna deıin barlyq aýyl sharýashylyǵy qurylymdary men úı sharýashylyqtary onlaın túrde sanaq.gov.kz resmı saıtynda aýyl sharýashylyǵy sanaǵynan óte alady.

Jedel keńes alý úshin 1446 baılanys ortalyǵy táýlik boıy jumys isteıdi. Sondaı-aq «Sanaq myrza» chat-boty men saıttaǵy onlaın-konsýltant sııaqty tsıfrlyq baılanys arnalary da qoljetimdi.

Eske salamyz, sanaqtyń ekinshi kezeńi 2025 jylǵy 20 qyrkúıekten 20 qazanǵa deıin ótedi. Bul kezeńde ıntervıýerler onlaın sanaqtan ótpegen úı sharýashylyqtaryn aralap, derekter jınaıtyn bolady.

Aýyl sharýashylyǵy sanaǵy – eldiń agrarlyq sektoryn tıimdi damytý úshin qajet sapaly statıstıkany qalyptastyrý men aýyl sharýashylyǵy óndirýshileri týraly derekterdi ózektendirýde mańyzdy ról atqarady.

Aıta ketelik Batys Qazaqstanda 1 myńnan astam aýyl sharýashylyǵy kásiporny sanaqtan ótpekshi.