Baılanys operatorlary alaıaqtardyń qońyraýyn anyqtaıdy — jańa erejeler bekitildi
ASTANA.KAZINFORM — Qazaqstanda baılanys qyzmetterin kórsetý qaǵıdalaryna ózgerister engizildi. Ózgerister bıyl 3 qarashada Jasandy ıntellekt jáne tsıfrlyq damý mınıstrliginiń buıryǵymen bekitildi.
Atap aıtqanda, jańa redaktsııada «bıometrııalyq derekter» uǵymy engizilgen. Bul jeke tulǵanyń fızıologııalyq jáne bıologııalyq erekshelikterin sıpattaıtyn, onyń tulǵasyn anyqtaýǵa múmkindik beretin jeke derekter.
Budan bólek baılanys operatorlarynyń aqparattyq-anyqtamalyq júıesinde táýlik boıy tegin kórsetiletin qyzmetter tizimi keńeıtildi. Olardyń qatarynda:
— baılanys qyzmetiniń sapasyna shaǵymdardy qabyldaý;
— qyzmetterdi jaqsartý jónindegi usynystardy qabyldaý;
— roýmıng qyzmetteri týraly aqparat berý;
— alaıaqtyq belgileri bar SMS-habarlamalar men qońyraýlar týraly ótinishterdi qabyldaý bar.
Sonymen qatar ózgeristerge sáıkes, endi jeke tulǵa óz atyna on abonenttik nómirge deıin rásimdeı alady. Bul jeke, otbasylyq jáne ózge de turmystyq maqsattar úshin jetkilikti san bolyp esepteledi.
Eger azamat onnan artyq nómir alǵysy kelse, ol operatorǵa qajettiligin dáleldeıtin negizdemeler men qujattardy, sondaı-aq qurylǵylardyń sıpattamasy men sáıkestendirý kodtaryn usynýy tıis.
Operator ótinishti qarap, nómirlerdi tirkeıdi nemese bas tartý sebebin túsindiredi. Sebep joıylǵannan keıin azamat qaıta ótinish bere alady.
Budan bólek jańa erejelerde alaıaqtyq belgileri bar qońyraýlar men habarlamalardy anyqtaý tártibi belgilengen.
Uıaly baılanys operatorlary ishki antıfrod júıelerin paıdalana otyryp, kúmándi áreketterdi anyqtaıdy jáne bul aqparatty Ulttyq banktiń antıfrod ortalyǵyna joldaıdy. Osy maqsatta operatorlar men ortalyqtyń aqparattyq bazalary biriktiriledi.
Operatorlar alaıaqtyq belgileri bar SMS-habarlamalar men qońyraýlardy, sondaı-aq GSM-shlıýzder (SIM-bokstar) arqyly jasalǵan áreketterdi anyqtaǵan jaǵdaıda, abonent týraly málimetterdi — aty-jóni, JSN jáne tirkelgen nómirlerdi antıfrod ortalyǵyna beredi.
Abonentten nemese antıfrod ortalyǵynan osyndaı qońyraýlar týraly aqparat túsken kezde operator eki jumys kúni ishinde tekserý júrgizedi.
Eger alaıaqtyq faktisi rastalsa, operator kúdikti nómir boıynsha baılanys qyzmetin ýaqytsha toqtatyp, eki jumys kúni ishinde antıfrod ortalyǵyn habardar etedi.
Al eger aqparat rastalmasa, operator bul týraly Antıfrod ortalyǵyna habar beredi.
Buıryq 2025 jylǵy 18 qarashadan bastap kúshine enedi. Buǵan deıin alaıaqtardan qalaı qorǵanýǵa bolatynyn jazǵanbyz.
Sonymen qatar nelikten qazaqstandyq nómirlerden alaıaqtar qońyraý shalýdy jalǵastyryp jatqanyn jazǵanbyz.