Baıqońyrmen birge balalarǵa ana tilinde bilim berý quqyǵyn da jalǵa berip jibergendeımiz - J. Súleımenov
ASTANA. Aqpannyń 17-si. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda QR Úkimet basshysynyń atyna saýal joldaǵan depýtat Jarasbaı Súleımenov, Baıqońyrdaǵy mektepterde memlekettik baǵdarlamamen bilim berý máselesin kóterdi,
dep habarlaıdy QazAqparat.
«Baıqońyrdaǵy 6 myńnan astam bala oqıtyn 6 qazaq mektebinde áli kúnge sabaqtar Reseı memleketiniń baǵdarlamasy boıynsha júrgizilip keledi. Bul másele osy ýaqytqa deıin birneshe márte kóterildi, biraq qabyldanǵan shara, túzelgen esh nátıje joq. Máselen, osy mektepterdegi bastaýysh mekteptiń 2-shi synybyna arnalǵan «Bizdi qorshaǵan álem» dep atalatyn oqýlyqty alyp qarańyz. Kitaptyń betasharynda orys tilindegi túpnusqa RF Bilim jáne ǵylym mınıstrligi, qazaq tilindegi aýdarmasyn QR Bilim jáne ǵylym mınıstrligi usynǵandyǵy jazylǵan. Osy kitap boıynsha, Baıqońyrdaǵy qazaq mektepterinde oqyp jatqan qazaq balalary Reseıdiń eltańbasymen, jalaýymen, ánuranymen tanysady, kórshi eldiń geografııasyn zertteıdi. Qazaqstan týraly, óziniń eli men jeri, Otany týraly birde bir aýyz sóz joq. Basqa oqýlyqtar da týra solaı. Osylaısha, biz Baıqońyrmen birge Ata zańymyzben qorǵalatyn óz ana tilimizde bilim alý quqyǵyn da Reseıge jalǵa berip jibergendeımiz», deıdi depýtat.
Onyń aıtýynsha, bundaı soraqylyqqa jol berip otyrǵan QR Bilim jáne ǵylym mınıstrligi qatelikti túzeýge esh asyǵatyn emes. Sonymen birge, jaǵdaıdyń bulaı qalyptasqanyna Reseı tarapynyń esh qatysy joq ekendigin aıtqan J. Súleımenov, aılaqty paıdalanýdyń negizgi qaǵıdattary týraly kelisimde bul jaıttyń múldem qarastyrylmaǵanyn atap ótti. «Baıqońyrdaǵy mektepte bilim alatyn da, olarǵa sabaq beretin de qazaqtar. Sonda nege ózimizdiń oqýshylardy memlekettik bilim baǵdarlamasyna sáıkes ázirlegen oqýlyqtarmen qamtamasyz ete almaı kelemiz», dedi J. Súleımenov.
