Baıqońyrlyqtarǵa obaǵa qarsy ekpe alý kerek - QR Densaýlyq saqtaý mınıstrligi

ASTANA. QazAqparat -  Qyzylorda oblystyq obaǵa qarsy stantsııasy monıtorıng boıynsha josparly jumys aıasynda Qyzylorda oblysynyń  5 aýdany jáne Qaraǵandy oblysy Ulytaý aýdanynyń aýmaǵynda Baıqońyrdan 12 shaqyrym qashyqtyqta shekteýli ýchaskede júrgizilgen zerthanalyq zertteýdiń nátıjesinde sarshunaq pen búrgeden, sondaı-aq 14 kemirgishten oba aýrýy tabyldy.

Bul týraly  QR Densaýlyq saqtaý mınıstrligi  Qoǵamdyq densaýlyq saqtaý komıteti habardar etti.

Sanıtarlyq-epıdemıologııalyq jaǵdaıdyń ahýaly jaıly aqparat almasý týraly qazirgi kelisim aıasynda, anyqtalǵan indet týraly «Baıqońyr» kesheni basshylyǵyna aqparat berilip, aýmaqqa profılaktıkalyq dezınsektsııa júrgizý jáne jumysshylarǵa vaktsınatsııa  egý usynyldy. Sondaı-aq, mundaı aqparat Qarmaqshy aýdanynyń ákimi men veterınarlyq qyzmet basshylyǵyna da jiberildi.

Qazirgi tańda Qyzylorda oblystyq obaǵa qarsy stantsııasy Josaly bólimshesiniń kómegimen qorǵanys aýmaǵyn qurý, halyq arasynda sanıtarlyq-aǵartý jumystary, sondaı-aq  4 tekshe shaqyrym aýmaqty dezınsektsııalyq óńdeý jumystary júrgizip jatyr.  

 TMD elderi terrıtorııasynda 2 mln sharshy km-den astam jerdi qamtıtyn oba qozdyrǵyshtyǵyn bildiretin obanyń enzootııalyq aýmaqtary bar ekendigin atap ótken jón.

Qazaqstanda obanyń enzootııalyq aýmaqtaryna 8 oblys jatady (Aqtóbe, Atyraý, Almaty, Jambyl, BQO, Qyzylorda, Mańǵystaý, Ońtústik Qazaqstan, Qaraǵandy oblysynyń keı jerleri jáne ShQO). Bul oblystar aýmaǵynda obaǵa qarsy stantsııalar jumys istep, onda jyl saıyn josparlyq tártippen oba qozdyrǵyshynyń bar-joqtyǵy baqylanady. Zoologoııalyq-parazıttik jáne zerthanalyq synamalardyń nátıjesin negizge ala otyryp, aldyn ala zararsyzdandyrý jáne deratızatsııalaý  sondaı-aq, turǵyndardy vaktsınatsııalaý sharalary ótkiziledi.

Bul sharalar respýblıkadaǵy oba boıynsha epıdemıologııalyq jaǵdaıdyń turaqtylyǵyn qamtamasyz etedi. 2003 jyldan beri  Qazaqstan turǵyndary arasynda oba dertimen aýyrǵandar tirkelgen joq.