Baıqońyrǵa týrıstik saparlar uıymdastyratyn týroperatorlar aıqyndaldy

ASTANA. QazAqparat - Baıqońyrdyń týrıstik tartymdylyǵyn arttyrý úshin qaladaǵy qonaq úı qoryn keńeıtý josparlanyp otyr. Bul týraly «QazAqparat» agenttigine QR Qorǵanys jáne aeroǵarysh ónerkásibi mınıstrliginen habarlady.

«Іske asyrý merzimi 2018-2035 jyldar bolatyn Baıqońyr qalasy damýynyń uzaq merzimdi baǵdarlamasynda «Baıqońyr» kesheniniń týrıstik potentsıalyn damytý boıynsha is-sharalar eskerilgen. Sonyń ishinde buqaralyq týrızmdi qamtamasyz etý úshin qonaq úı qoryn keńeıtý, avtokólik parkin keńeıtý boıynsha sharalardy iske asyrý josparlanǵan. Sonymen qatar Baıqońyr qalasynda mádenı ári oıyn-saýyq ınfraqurylymyn jáne «Baıqońyr» kesheninde týrızm ınfraqurylymyn (zymyran ushyrýlaryn baqylaý úshin qaraý alańdaryn salý) damytý, «Baıqońyr» ǵarysh aılaǵy nysandary jáne jaqyn ornalasqan aýdandar («Qorqyt-ata» memorıaldyq kesheni, «Qambash» kóli jáne t.b.) boıynsha tıisti týrlar ázirleý  kózdelgen», - deıdi mınıstrlik ókilderi.

Munymen qosa, keletin shetel týrısteriniń sanyn kóbeıtý úshin vıza, ruqsat berý rásimderin barynsha jeńildetý boıynsha is-sharalar josparlanǵan.

«Búgingi kúni «Baıqońyr» ǵarysh keshenine týrıstik saparlar uıymdastyrýǵa múmkindik alatyn týroperatorlardyń tizimi qalyptastyrylǵan. Sonyń ishinde qazaqstandyq týroperatorlar de bar», - delingen vedomstvo málimetinde.