Baıqońyrǵa kelesi ekspedıtsııaǵa arnalǵan ǵarysh kemesi jetkizildi

BAIQOŃYR. QazAqparat – Baıqońyr ǵarysh aılaǵynda 2020 jylǵy ushyrylymdarǵa daıyndyq júrip jatyr, dep habarlaıdy QazAqparat tilshisi.

Ǵarysh aılaǵyna ushý aldynda daıyndyq júrgizý úshin «Soıýz MS-16» basqarylatyn ǵarysh kemesi jetkizildi. Reseıdiń zymyran-ǵarysh salasyndaǵy kásiporyn mamandary ony vagonnan túsirip, ushý kemesin qabyldap alý úshin jáne ony saqtaý úshin montaj-synaq ǵımaratyna qoıdy, dep habarlady «Roskosmostyń» baspasóz qyzmetinen.

Basqarylatyn keme tehnıkalyq keshende saqtalmaq. «Soıýz MS-16» kóliktik basqarylatyn kemesi Halyqaralyq ǵarysh stansasynan kezekti 63/64-shi negizgi ekspedıtsııamen birge 2020 jyldyń 9 sáýirinde ushyrylady dep josparlanyp otyr.

63/64 HǴS quramyna reseılik Nıkolaı Tıhonov, Andreı Babkın jáne amerıkalyq Krıs Kessıdı, olardyń dýbleri reseılik ǵaryshkerler Anatolıı Ivanıshın men Ivan Vagner, sondaı-aq amerıkalyq astronavt Stıven Boýen bekitildi. Ekıpajdar Baıqońyrǵa ádettegideı ushýǵa eki apta qalǵan kezde keledi.

Avtor: Sara Qabıqyzy