Baıqońyrdyń bas sanıtarlyq dárigeri obaǵa qarsy profılaktıkany toqtatty

BAIQOŃYR. QazAqparat - «Baıqońyr» kesheni boıynsha bas memlekettik sanıtarlyq dárigerdiń qaýlysymen 17P alańy aýmaǵynda oba aýrýynyń aldyn alý boıynsha profılaktıkalyq sharalar toqtatyldy, dep habarlaıdy QazAqparat tilshisi.

Bul týraly Baıqońyr qalasynyń turǵyndaryna ǵarysh kesheniniń bas sanıtarlyq dárigeri Sergeı Ogar habarlady. «Baıqońyr» kesheniniń aýmaǵynda tabıǵı-oshaqty asa qaýipti ınfektsııalar boıynsha epıdemııalyq ahýalǵa taldaý júrgize kele, atalmysh ınfektsııa boıynsha epıdemııalyq jaǵdaı turaqtanǵanyn atap ótemin», - dep málim etti ol.

27 maýsym - 3 shilde aralyǵynda 600 gektar aýmaq tekserildi, epızootııalyq oshaqtar aımaqtarynda dezınsektsııa júrgizildi. Dalalyq jerlerden alynǵan synama materıaldarǵa Qyzylordanyń obaǵa qarsy kúres stansasy bazasynda taldaý júrgizildi. 600 gektar aýmaq zararsyzdandyrylyp, sý alý bógetinde jumys isteıtin 70 adam obaǵa qarsy egildi.

«Qyzylorda obaǵa qarsy kúres stansasy» respýblıkalyq memlekettik mekemesiniń aqparatyna sáıkes, «Baıqońyr» kesheniniń «Levoberejnyı» sý alý aýmaǵynan obany anyqtaý maqsatynda alynǵan synama materıaldardan bakterıologııalyq jáne serologııalyq oba anyqtalmady. «Levoberejnyı» sý alý aýmaǵynda oba boıynsha epıdemıologııalyq jaǵdaıdyń oń dınamıkasyn eskere otyryp,  epıdemııaǵa qarsy júrgizilgen jáne profılaktıkalyq sharalardyń nátıjesi boıynsha, «Baıqońyr» kesheni turǵyndarynyń arasynda oba aýrýynyń tirkelmeýine baılanysty, obanyń aldyn alý boıynsha sharalar toqtatylsyn», - delingen «Baıqońyr» kesheniniń bas sanıtarlyq dárigeriniń qaýlysynda.

Eske salsaq, 30 maýsym kúni Qyzylordanyń obaǵa qarsy kúres stansasy Baıqońyr mańynan oba indetiniń tabylǵandyǵyn habarlaǵan edi. Qaýipti ınfektsııa oshaǵynan alynǵan synama saraptamaǵa jóneltilgen bolatyn.

Sál keıinirek, Baıqońyr qalasy ákimshiliginiń tótenshe jaǵdaılar bólimi shahar aýmaǵynda qaýipti ınfektsııa tabylmaǵandyǵyn málim etti.