«Baıqońyrdy» jalǵa berý shartynyń talaptary ózgerdi

NUR-SULTAN. QazAqparat – Parlament Senaty Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń keńeıtilgen otyrysynda «1994 jylǵy 10 jeltoqsandaǵy QR Úkimeti men RF Úkimeti arasyndaǵy «Baıqońyr» keshenin jalǵa berý shartyna ózgeris engizý týraly hattamany ratıfıkatsııalaý týraly» zań jobasy qaraldy, dep habarlaıdy QazAqparat tilshisi.

Aıta keteıik, Hattamaǵa 2017 jyly qarashada Chelıabi qalasynda eki el prezıdentteriniń qatysýymen ótken QR men RF arasyndaǵy óńirlik yntymaqtastyq jónindegi forým aıasynda qol qoıyldy. Hattamamen «Baıqońyr» keshenin jalǵa berý sharty №2 qosymshasyn jańa redaktsııada berý kózdelgen.

QR Aýyl sharýashylyǵy vıtse-mınıstri Rústem Qurmanovtyń aıtýynsha, sharttyń ekinshi qosymshasynda «Baıqońyr» kesheniniń tehnologııalyq jáne tehnıkalyq nysandarynyń, tasymaldaǵysh zymyrandardan bólinetin bólikteri qulaıtyn aýdandarynyń koordınattary kórsetilgen.

Atap aıtqanda, Hattamamen oǵan jalpy alańy 11,6 myń gektar tórt jer ýchaskesi jalǵa alý bóliginen shyǵarylady. Jalpy alańy 1 740 gektar eki ýchaske Qarmaqshy aýdany Tóretam kentin keńeıtý úshin, sondaı-aq 9 950 gektar eki ýchaske «Batys Eýropa-Batys Qytaı» halyqaralyq tranzıt dálizin, «Almaty-Máskeý» temirjolyn salý jáne «Beıneý-Shymkent» gaz qubyrynyń jelilik bóligi úshin alynyp otyr.

Onyń sózine qaraǵanda, kórsetilgen jer telimderi Qyzylorda oblysynyń damýy úshin qajet. Osy sharalar óńirdiń áleýmettik jaǵdaıyna jáne ekonomıkasyna oń áserin tıgizedi.

«Bul jer telimderin jalǵa alýdan shyǵarý Reseı tarapynyń Qazaqstanǵa jyl saıynǵy jalǵa alý tólemi somasynyń qysqarýyna yqpal etpeıdi», - dedi R. Qurmanov.

Talqylaýdan keıin komıtet músheleri zań jobasyn Parlament Senaty jalpy otyrysynyń qaraýyna shyǵarý týraly sheshimdi qabyldady.