Baıqońyrdy damytý jónindegi úkimetaralyq komıssııanyń otyrysy keıinge shegerildi
ASTANA. QazAqparat - 6-7 maýsymǵa josparlanǵan «Baıqońyr» kesheni jónindegi qazaqstandyq-reseılik úkimetaralyq komıssııanyń besinshi otyrysynyń datasy ózgerdi, dep habarlaıdy QazAqparat.
Májilistegi Úkimet saǵytynan keıin QR Qorǵanys jáne aeroǵarysh ónerkásibi vıtse-mınıstri Marat Nurǵojın atalǵan kezdesý shamamen 13-15 shilde aralyǵynda uıymdastyrylatynyn jetkizdi.
Bul jıyndy ótkizý merzimi Astanada Shanhaı Yntymaqtastyq Uıymynyń sharalaryn ótkizýge baılanysty aýystyryldy.
«Kún tártibine on másele shyǵaryldy, ıaǵnı olar Baıqońyr keshenin damytý týraly ótken jyly qabyldanǵan tujyrymdamany júzege asyrýǵa qatysty bolyp otyr. Sonymen qatar negizgi másele «Báıterek» zymyran keshenin qurýǵa baılanysty», - dedi vıtse-mınıstr.
Aıta keteıik, «Baıqońyr» kesheni boıynsha odan ári yntymaqtastyq Tujyrymdamasy ázirlenip, qujatqa qol qoıylǵan bolatyn.
