«Baıqońyrdan» ushyrylǵan júk kemesi HǴS-qa rekordty ýaqytta jetti

BAIQOŃYR. QazAqparat - Baıqońyr ǵarysh aılaǵynan ushyrylǵan «Progress MS-11» júk tasymaldaý kemesi 3 saǵat 21 mınýttan keıin Halyqaralyq ǵarysh stantsııasymen (HǴS) túıisti, dep habarlaıdy QazAqparat tilshisi.

«Reseıǵarysh» memlekettik korporatsııasynyń málimetinshe, «Progress MS-11» HǴS-qa jasalǵan ushyrylymdar tarıhyndaǵy eń jyldam ǵarysh kemesi bolyp otyr. Bul, basqarylatyn kosmonavtıka úshin jańa múmkindikter ashady. Buǵan deıingi rekord «Progress MS-09» kemesine tıesili. Onyń HǴS-pen túıisý ýaqyty - 3 saǵat 40 mınýt.

«Progress MS-11» tasymaldaý kemesi HǴS-qa 2,5 tonnadan astam ártúrli júkti jetkizdi: 1,4 tonnadan artyq qurǵaq júkter, 900 keli otyn, 420 keli sý, 47 keli ballondaǵy aýa men ottegi. Sondaı-aq olardyń arasynda ǵylymı quraldar-jabdyqtar, ekıpaj múshelerine arnalǵan azyq-túlik konteınerleri, kıim-keshekter, medıtsınalyq preparattar jáne gıgıenalyq zattar bar.

Avtory Sara Qabıqyzy