«Baıqońyrdan» ushyrylǵan keme Tyva Respýblıkasynyń aýmaǵyna qulady
ASTANA. QazAqparat - «Baıqońyrdan» ushyrylǵan "Progress-MS-04"ǵarysh kemesi 6 mınýttan keıin baılanystan joǵalyp, Halyqaralyq ǵarysh stansysyna jetpedi, dep habarlaıdy QazAqparat «Roskosmostyń» resmı saıtynda jarııalanǵan málimetke silteme jasap.
«Roskosmostyń» habarlaýynsha, keme ǵarysh orbıtasyna jetpeı Reseı-Mońǵolııa shekarasyna qulady.
«382-inshi sekýndqa deıin zymyran-tasymaldaǵyshtyń ushyrylymy shtattyq rejimde ótti. Ushyrylymnyń 382-inshi sekýndynan keıin telemetrııalyq aqparatty qabyldaý úzildi. Shtattyq baqylaý quraldary kemeniń orbıtada qyzmetke kiriskenin tirkemedi», - delingen taratylǵan málimette.
«Aldyn ala aqparatqa sáıkes, shtattan tys jaǵdaıǵa baılanysty kóliktik-júk kemesiniń joǵalýy shamamen 190 shaqyrym bıiktikte Tyva Respýblıkasynyń adam júrmeıtin taýly terrıtorııasynda oryn aldy. Jáne onyń bólshekteriniń deni atmosferanyń tyǵyz qabattarynda janyp ketti. Memlekettik komıssııa qalyptasqan shtattan tys jaǵdaıǵa taldaý júrgizýde», - dep habarlady Reseıdiń ǵarysh agenttigi.
Korporatsııadan atap ótkendeı, júk kemesiniń joǵalyp ketýi Halyqaralyq ǵarysh stansysynyń qalypty qyzmetine jáne stansydaǵy ekıpajdyń ómirine keri áserin tıgizbeıdi.
