Baıqońyrdan taza otynmen jumys isteıtin zymyran 2022 jyldan ushyryla bastaıdy

ASTANA. QazAqparat -« Baıqońyr» ǵarysh aılaǵynan taza otynmen jumys isteıtin zymyran 2022 jyldan  bastap ushyrylady. Bul týraly búgin elordada ótip jatqan QR Parlamenti Májilisi men RF Federaldy jınalysynyń Memlekettik dýmasy komıtetteriniń kezdesýinde Májilis tóraǵasynyń orynbasary Vladımır Bojko aıtty, dep habarlaıdy QazAqparat.

«Qazaqstan men Reseıdiń ekijaqty yntymaqtastyǵy jaıynda aıta kele, birlesken ǵarysh baǵdarlamasynyń qarqyndy júzege asyrylyp jatqandyǵyn atap ótpeske bolmaıdy. Ótken jyly qol qoıylǵan  «Baıqońyr» keshenindegi odan ary yntymaqtastyq tujyrymdamasynyń  jáne bizdiń memleket basshylarymyzdyń saıası erik-jigeriniń arqasynda ekologııalyq turǵyda taza otynmen jumys isteıtin «Báıterek» ǵaryshtyq zymyran kesheni qurylysynyń jobasy is júzinde júzege asyrylý kezeńine shyqty», - dedi  Májilis tóraǵasynyń orynbasary.

Osy oraıda Bojko Sochıdegi Qazaqstan men Reseı Prezıdentteriniń kezdesýi barysynda ekologııalyq turǵyda taza otynmen jumys isteıtin zymyrandy ushyra bastaý merzimin 2025 jyldan 2022 jylǵa shegerý týraly ýaǵdalastyqqa qol jetkizilgenin atap ótti.

«Osylaısha, endi 5 jyldan keıin «Baıqońyrda» barlyq halyqaralyq standarttarǵa saı keletin jańa, ekologııalyq qaýipsiz zymyran-ǵarysh kesheni qurylatyn bolady», - dedi ol.