20:28, 19 Tamyz 2019 | GMT +6
Baıqońyrdan robot basqaratyn «Soıýz MS» kemesi ushyrylady
BAIQOŃYR. QazAqparat – Búgin «Soıýz MS-14» ǵarysh kemesi ornatylǵan «Soıýz-2.1a» zymyran tasyǵyshy montajdaý-synaq korpýsynan shyǵarylyp, Baıqońyr ǵarysh aılaǵynyń № 31 alańyndaǵy start keshenine ornatyldy, dep habarlaıdy «QazAqparat» HAA tilshisi.
«Roskosmos» baspasóz qyzmetiniń málimetinshe, mamandar ushý aldyndaǵy tehnologııalyq operatsııalarǵa kiristi.
«Soıýz MS» basqarylatyn ǵarysh kemesi pılotsyz ushatyn alǵashqy keme bolmaq. Ǵaryshkerdiń ornyna Skybot F-850 atty adam keıpindegi robot otyrǵyzylǵan. Ol «Androıdnaıa tehnıka» kompanııasynyń Perspektıvaly zertteýler qorymen birlesip shyǵarǵan ónimi.
Jospar boıynsha, «Soıýz MS-14» ǵarysh kemesi bar «Soıýz-2.1a» zymyran tasyǵyshy 22 tamyz kúni Nur-Sultan qalasynyń ýaqytymen 09:38-de ushyrylýy tıis.
«Soıýz MS-14» Halyqaralyq ǵarysh stantsııasyna ǵaryshkerlerdiń kerek-jaraǵyn, ǵylymı zertteýlerge qajetti qondyrǵyny, medıtsınalyq quraldar, azyq-túlik, ekıpajǵa jiberilgen zattardy jáne taǵy basqalaryn jetkizedi.
