Baıqońyrdan OneWeb spýtnıkterin ushyrý sáti tikeleı efırde kórsetiledi

NUR-SULTAN. QazAqparat – Baıqońyr ǵarysh aılaǵynan «Fregat» údemeli blogy jáne OneWeb brıtandyq 34 ǵarysh apparaty bar «Soıýz-2.1b» zymyran-tasyǵyshyn ushyrý 2021 jyldyń 22 tamyzy kúni Nur-Sultan ýaqytymen saǵat 04:13-ke josparlanǵan, dep habarlaıdy QazAqparat tilshisi.

Buǵan deıin zymyran-tasyǵyshyn ushyrý 20 tamyzǵa josparlanǵan bolatyn. Alaıda tehnıkalyq sebepterge baılanysty bir kún keıinge shegerilgen edi. Keıinirek jerústi basqarý jáne ǵarysh apparatyn baqylaý júıesinde qosymsha jumystar júrgizý úshin tapsyrys berýshi zymyrandy ushyrýdy 22 tamyzǵa aýystyrýǵa ótinish jasaǵan.

Sońǵy aqparatqa sáıkes, Baıqońyr ǵarysh aılaǵynan zymyran-tasyǵyshty ushyrý 2021 jylǵy 22 tamyz kúni Nur-Sultan ýaqyty boıynsha saǵat 04-13-ke belgilenip otyr. Ushyrý sátinen tikeleı kórsetilim Roskosmostyń saıtynda jáne áleýmettik jelilerinde kórsetiledi. Kórsetilim 22 tamyz kúni Nur-Sultan ýaqytymen saǵat 03:20-da bastalady.

Aıta keteıik, OneWeb spýtnıkteriniń jańa partııasy Baıqońyrǵa 2021 jyldyń 30 shildesinde jetkizildi. OneWeb-tiń 34 ǵarysh apparatyn ushyrý Baıqońyr ǵarysh aılaǵynyń 31-shi alańynyń «Vostok» ushyrý kesheninen júzege asyrylady.