Baıqońyrdan Irannyń spýtnıgi ushyrylady

BAIQOŃYR. QazAqparat – Baıqońyr ǵarysh aılaǵynda «Soıýz-2.1b» zymyran-tasyǵyshyn spýtnıkter tobymen ushyrý jumystary júrip jatyr, dep habarlaıdy QazAqparat tilshisi. Spýtnık 9 tamyzynda aılaqtan ushyrylmaq.

Roskosmos baspasóz qyzmetiniń málimetinshe, «Fregat» údetkish blogy bar «Soıýz-2.1 b» zymyran tasyǵyshy Iran Islam Respýblıkasynyń tapsyrysy boıynsha «Haııam» Jerdi qashyqtan zondtaý (JQZ) ǵarysh apparatyn orbıtaǵa shyǵarýy tıis.

Spýtnık Roskosmos quramyna kiretin kásiporyndarda jasalǵan.

Sondaı-aq topqa Irannyń JQZ spýtnıgimen birge ǵaryshqa Reseıdiń jetekshi joǵary oqý oryndary, kommertsııalyq kompanııalar men kommertsııalyq emes uıymdar ǵylymı jáne tehnologııalyq zertteýler úshin qurǵan 16 shaǵyn ǵarysh apparaty - reseılik shaǵyn spýtnıkter ushyrylady.