Baıqońyrdan ǵaryshqa attanatyn ekıpaj shtattan tys jaǵdaılarmen jumys isteýde
«Roskosmos ǵaryshkeri Oleg Kononenko, Kanada ǵarysh agenttiginiń astronavty Davıd Sen-Jak jáne NASA astronavty Enn MakKleın, sondaı-aq olardyń dýblerlary - Roskosmos ǵaryshkeri Aleksandr Skvortsov, Eýropa ǵarysh agenttiginiń astronavty Lýka Parmıtano jáne NASA astronavty Endrıý Morgannan qurylǵan 58/59 ekspedıtsııasynyń negizgi ekıpajy emtıhandyq sessııany aıaqtaýǵa jaqyn», - dep málim etti Ǵaryshkerlerdi daıarlaý ortalyǵynyń baspasóz qyzmetinen.
Ǵaryshkerler men astronavtar jattyǵý kezinde baılanys quraldarynyń problemasy, stansany ottegimen qamtamasyz etý júıesiniń isten shyǵýy syndy shtattan tys jaǵdaılardy eńserýi tıis boldy.
Emtıhan qabyldaý komıssııasynyń qorytyndysy boıynsha, qos ekıpajdyń komandırleri men bortınjenerleri aldaryna qoıylǵan mindetterdi jaqsy oryndap shyqty.
Endi HǴS-58/59-diń negizgi jáne qosalqy ekıpajdary HǴS-tiń reseılik segmentiniń jáne «Soıýz» kóliktik basqarylatyn kemesiniń trenajerlarynda keshendi emtıhandyq jattyǵýlar ótkizedi.
«Soıýz MS-11» kóliktik basqarý kemesi bar «Soıýz-FG» zymyran tasyǵyshyn Baıqońyrdan ushyrý 2018 jyldyń 3 jeltoqsanyna belgilenip otyr.
Eske sala ketsek, 2018 jylǵy 11 qazan kúni 14 saǵat 40 mınýt 15 sekýndta Baıqońyr ǵarysh aılaǵynan «Soıýz MS-10» kóliktik basqarylatyn kemeni orbıtaǵa alyp shyǵýy tıis «Soıýz FG» zymyran tasyǵyshy ushyrylǵan bolatyn. Alaıda start berilgen soń birneshe mınýttan keıin Roskosmos saıtyndaǵy tikeleı kórsetilim úzilip, dıktor «zymyran tasyǵyshtyń apatqa ushyraǵanyn» habarlady.
Sol kúni tús aýa QR ІІM Tótenshe jaǵdaılar komıtetiniń tóraǵasy Vladımır Bekker ǵaryshkerlerdiń din-aman tabylǵanyn jetkizdi. Ǵarysh kemesiniń bólshekteri Qaraǵandy oblysynyń Ulytaý aýdany aýmaǵynan tabyldy.
Keıin «Soıýz FG-10»-nyń satylary qulaǵan jerdiń radıoaktıvti jáne hımııalyq ahýaly normaǵa saı ekendigi jáne qurbandar men zardap shekkender joqtyǵy habarlandy.
