Baıqońyrdan ǵarysh kemesi qashan ushyrylatyny belgili boldy

BAIQOŃYR. QazAqparat – Baıqońyr ǵarysh aılaǵynda ǵarysh kemesin kezekti ushyrýǵa daıyndyq bastaldy. Halyqaralyq ǵarysh stantsııasynan «Progress MS-24» ǵaryshtyq júk kóligi ushyrylady, dep habarlaıdy QazAqparat tilshisi.

S.P.Korolev atyndaǵy «Energııa» zymyran-ǵarysh korporatsııasynyń Baıqońyr fılıalynyń mamandary ǵarysh aılaǵynda 2022 jyldyń jeltoqsan aıynan beri saqtalǵan kemeni qaıta iske qosty, dep habarlady kásiporynnyń baspasóz qyzmetinen. Ǵarysh aılaǵy 254-shi alańynyń montajdaý-synaý korpýsynda «Progress MS-24» ǵaryshtyq júk kóligin syrtqy tekserý jáne borttyq júıelerdiń jaı-kúıine baqylaý júrgizildi. Kún batareıalary panelderin ornalastyrý tetikteri tekserildi jáne aldaǵy elektr synaqtaryna jerústi jabdyqtary daıyndaldy.

«Progress MS-24» júk kemesi bar «Soıýz-2.1 a» zymyran tasyǵyshyn ushyrý 2023 jylǵy 23 tamyzǵa josparlanǵan. Baıqońyr ǵarysh aılaǵynan buǵan deıingi ushyrý protsesi 2023 jyldyń 24 mamyrynda boldy. Ol kezde HǴS-qa «Progress MS-23» kóliktik júk kemesi attandy.

Eki aıdyń ishinde HǴS-qa stantsııanyń jáne ǵaryshkerlerdiń ómiri úshin qajetti júkteri bar eki keme jiberiledi. Qazir Halyqaralyq ǵarysh stantsııasynda 69-shy uzaq ekspedıtsııanyń ekıpajy jumys istep jatyr. Onyń quramynda Roskosmos ǵaryshkerleri Sergeı Prokopev (HǴS-69 komandıri), Dmıtrıı Petelın jáne Andreı Fedıaev, NASA astronavttary Frantsısko Rýbıo, Stıven Boýen, Ýorren Hobýrg jáne BAÁ astronavty Sultan Ál-Neıadı bar.