Baıqońyrdan bıyl ushqan sońǵy zymyran tikeleı efırden kórsetiledi

BAIQOŃYR. QazAqparat – Baıqońyr ǵarysh aılaǵynda OneWeb ǵarysh apparattarynyń jańa toptamasyn ushyrýǵa daıyndyq júrip jatyr, dep habarlaıdy QazAqparat.

«Fregat» údemeli blogy jáne 36 OneWeb ǵarysh apparaty bar «Soıýz-2.1b» zymyran tasyǵyshy Baıqońyr ǵaryshaılaǵynyń «Vostok» ushyrý kesheninde 2021 jyldyń 24 jeltoqsanynda ornatylǵan.

Ushyrý kesheni júıeleri qyzmetiniń basty synaqtary, zymyranǵa otyn quıý qubyrlarynyń tumshalylyǵyn tekserý sátti aıaqtaldy.

Búgin komıssııa otyrysy ótip, onyń qorytyndylary boıynsha zymyran-tasyǵyshqa otyn quıý jáne belgilengen ýaqytta ushyrý sheshimi qabyldanady, dep habarlaıdy Roskosmostyń baspasóz qyzmetinen.

Buryn habarlanǵandaı, Baıqońyr osymen bıylǵy ushyrý baǵdarlamasyn aıaqtaıdy.

«Fregat» údemeli blogy jáne 36 OneWeb ǵarysh apparaty bar «Soıýz-2.1b» zymyran tasyǵyshyn ushyrý 27 jeltoqsan kúni Nur-Sultan ýaqytymen saǵat 19:10-ǵa josparlanǵan.

Baıqońyrdan 2021 jylǵy sońǵy ushyrý protsesi tikeleı efırden kórsetiledi.

Kórsetilim Roskosmos saıtynda Nur-Sultan ýaqytymen saǵat 18.00-de bastalady.