Baıqońyrdan aı saıyn bir jer serigin ushyra alamyz - Asqar Mamın

ASTANA. QazAqparat - QR Premer-Mınıstriniń birinshi orynbasary Asqar Mamın «Baıqońyr» ǵarysh aılaǵynyń bolashaǵy týraly aıtyp berdi , dep habarlaıdy QazAqparat tilshisi.

«Qazaqstan egemen el bolǵaly beri «Baıqońyr» ǵarysh aılaǵynan myńdaǵan zymyran ushyryldy. Búginde Roskosmospen birlese otyryp, ǵylymı-zertteý jumystaryn júrgizip kelemiz. Aldaǵy ýaqytta «Báıterek» zymyran keshenin iske qosýdy josparlap otyrmyz. Sonyń arqasynda aı saıyn bir jer serigin ǵaryshqa ushyra alamyz. Biz «Baıqońyrdy» jańartý men keńeıtý sharalaryna qarjy salýdy jalǵastyra beremiz», - dedi A.Mamın Qazǵaryshtyń 25 jyldyǵyna arnalǵan forýmda. Atalǵan shara V halyqaralyq «KADEX-2018» qarý-jaraq pen áskerı texnıka kórmesi aıasynda ótti.

Vıtse-premerdiń aıtýynsha, «KazSat» spýtnıktik júıesi ishki suranysty tolyǵymen qamtamasyz etip otyr. Atalǵan júıeni memlekettik organdarda, jeke sektorda paıdalanyp keledi.

«Máselen, jerdi qashyqtan zontdaý júıesiniń málimetterin Aýyl sharýashylyǵy mınıstrligi, Qorǵanys mınıstrligi, Іshki ister mınıstrligi qoldanyp otyrady. Biz qazirgi áleýetimizdi odan ary damytatyn bolamyz. Sebebi ǵarysh tehnologııalary ekonomıkalyq damýǵa aıtarlyqtaı úles qosyp otyr», - dep atap kórsetti A.Mamın. 

Aıta keteıik, aǵymdaǵy jyly Qazaqstannyń jańa eki jer serigi ǵaryshqa ushyrylady. «Jyldyń sońynda bir taǵy eki jańa jer serigin ǵaryshqa ushyraıyn dep otyrmyz. Atalǵan apparattardy Qazaqstan men Ulybrıtanııa mamandary qurastyrdy. Búginde atalǵan joba 98 protsentke daıyn. Sonyń arqasynda qazaqstandyq mamandardyń bes birdeı jańalyǵy synaqtan ótedi. Ol mamandardyń barlyǵy Eýropa men Reseıde tájirıbe jınaqtap qaıtqan», - dep atap kórsetti M.Nurǵojın.