Baıqońyrdan «Arktıka-M» ǵarysh apparatynyń ushyrylý sáti tikeleı efırden kórsetiledi

BAIQOŃYR. QazAqparat – 2021 jylǵy qystyń sońǵy kúninde Baıqońyr ǵarysh aılaǵynda kezekti ǵaryshqa ushyrý ótedi, dep habarlaıdy QazAqparat.

28 aqpan kúni Nur-Sultan qalasy ýaqytymen saǵat 12:55-te Baıqońyr ǵarysh aılaǵynyń №31 alańynan «Fregat» údemeli blogy bar Soıýz-2. 1b» zymyran-tasyǵyshynyń ushyrylýy josparlanǵan, bul apparattar reseılik «Artktıka-M» gıdrometeorologııalyq spýtnıgin orbıtaǵa shyǵarady.

Roskosmos baspasóz qyzmetiniń málimetinshe, ushyrý sáti tikeleı efırden kórsetiledi. Kórsetilim Nur-Sultan ýaqytymen saǵat 12:10-da, starttyń bastalýyna 45 mınýt qalǵanda bastalady.

Ushyrýǵa daıarlyq tsıklogrammasyna sáıkes, erteń tańerteń komıssııanyń otyrysy ótip, onyń qorytyndysy boıynsha zymyranǵa otyn quıý jáne ushyrý týraly sheshimder qabyldanady.

Baıqońyr kesheniniń aýmaǵynda aýa raıy turaqtaldy, búgin kúndiz aýa temperatýrasy nólge jýyq gradýsty kórsetip tur. Sınoptıkter ushyrý kúni kún raıynyń jyly bolyp, azdaǵan jel soǵatynyn boljap otyr. Birneshe kún buryn Baıqońyrda daýyl kóterilip, aýanyń temperatýrasy 25 gradýsqa deıin tómendegen.